“Ланс” клуби Абдуқодир Ҳусановни январда сотишга тайёр

Франциянинг “Ланс” клуби раҳбарияти 20 ёшли ҳимоячи Абдуқодир Ҳусановни қишки трансфер ойнасида сотиш ниятида эканини расман тасдиқлади.

Матбуотда футболчининг “Манчестер Сити”га ўтиши ҳақида кўплаб миш-мишлар тарқалмоқда, бироқ клуб раҳбарияти ҳозирча маълум бир харидор ҳақида изоҳ беришни истамаяпти.

“Абдуқодир Ҳусанов ҳақиқатан ҳам клубимизни тарк этади. Ҳозирча бизни қониқтирадиган таклифни олганимиз йўқ”, дея баёнот берди “Ланс” клуби бошқарув директори Пер Дреосси.

Аввалроқ “Ньюкасл”, “Манчестер Сити”, “Реал” клублари Ҳусановни ўзининг ҳимоя чизиғини кучайтириш учун кўриб чиқаётган футболчилар қаторига қўшгани маълум қилинган эди.

Абдуқодир Ҳусанов “Ланс” клуби сафида Лига 1 доирасида 13 та ўйинда майдонга тушди. Ушбу давр мобайнида “ПСЖ”га қарши учрашувда қизил карточка олди ва 2 ўйинни ўтказиб юборди. Шунга қарамай, у Франция чемпионатининг энг истиқболли ёш ҳимоячиларидан бири сифатида эътироф этилмоқда.

Машҳур агент Хорхе Мендеш, футбол оламидаги энг йирик келишувларни амалга оширган шахслардан бири ҳисобланади. У Ҳусанов учун янги клуб топиш ишларини бошқараётгани хабар қилинмоқда. Мендешнинг бу жараёнга қўшилгани футболчининг бозор қийматининг ошиб бораётганини тасдиқлайди. Унинг трансфер нархи 25-30 миллион евро (20-25 миллион фунт) атрофида баҳоланмоқда.

Transfermarkt портали маълумотларига кўра, Абдуқодир Ҳусановнинг бозор қиймати 12 миллион еврони ташкил этади. “Ланс” клуби эса мазкур трансфердан 40 миллион евро ишлаб олиш ниятида.