Алматыда кафедегі жаппай төбелес: шетелдік студенттер депортацияланады
Ғылым және жоғары білім министрі Саясат Нұрбек Алматыдағы кафеде шетелдік студенттер арасында болған жаппай төбелес оқиғасына пікір білдірді, - деп хабарлайды Tengrinews.kz тілшісі.
Төбелестің видеосы желіде тарады. Кадрларда бірнеше адам бір-бірін ұрып жатқаны, олар орындықтар, таяқ және тіпті үстелдерді қолданылғаны көрінеді. Үкімет кулуарында журналистер министр Саясат Нұрбектен оқиғаның егжей-тегжейі туралы сұрады.
Министрдің айтуынша, қазақстандық студенттер төбелеске қатыспаған.
"Алты адам – Үндістаннан келген студенттер, бұл олардың ішкі мәселесі. Қазіргі уақытта Алматы Полиция департаменті тергеу жүргізіп жатыр, нәтижені күтейік. Мен елшіліктермен тікелей байланыстамын, сөйлесіп, осы студенттерді депортациялау туралы ортақ шешім қабылдадық. Бұл біздің ұстанымымыз. Президент жақында берген сұхбатында әрбір шетелдік өз елінде заңдарды қалай құрметтесе, Қазақстанда да оларды сақтау керек екенін айтты. Депортация мәселесі елшілікпен шешілді", – деп мәлімдеді министр.
Сілтемесіз жаңалық оқисыз ба? Онда Telegram желісінде парақшамызға тіркеліңіз!