Arkadag şäheriniň edara-kärhanalarynyň ýolbaşçylary öz işgärlerini işleýän şäherinden ipoteka esasynda jaý satyn almaga höweslendirýärler. Bu barada Azatlyk Radiosynyň habarçysy şäherde işleýän býujet işgärlerine salgylanyp, 8-nji ýanwarda maglumat berdi.
“Soňky hepdelerde Arkadag şäherinde işleýän mekdep mugallymlary, kitaphana we medeniýet öýüniň işgärleri, häkimlik we jemagat hojalygy işgärleri bilen geçirilýän ýygnaklarda edara ýolbaşçylary jaý satyn almagy yzygiderli ündeýärler” diýip, ýagdaýlardan habarly býujet işgäri anonimlik şertinde aýtdy.
Edara ýolbaşçylarynyň edýän teklibinde 20 ýyllyk ipoteka esasynda satyn alynýan jaýyň ilkibada geçirilmeli hökmany tölegi, öýüň ululygyna görä, 75-80 müň manat möçberinde kesgitlenen.
“Işgärleriň ilkinji bäş ýylyň dowamynda her aý zähmet hakyndan 500 manat saklanjakdygy, ondan soňky ýyllarda munuň 1800 manada Barabar boljakdygy aýdylýar” diýip, Arkadagdaky mekdepleriň biriniň mugallymy häzir bu şäherdäki býujet işgärleriniň aglabasynyň Gökdepe etrabynyň ýaşaýjylarydygyny we olaryň golaýdaky obalardan kireýine jaý alyp işe gatnaýandygyny anonimlik şertinde gürrüň berdi.
Mundan bir ýyl gowrak ozal, habarçylarymyz bu şäherde iň arzan kottež jaýlarynyň 1 million dollardan, dört otagly kwartiralaryň 350 müň dollardan satylýandygyny habar berdiler.
Arkadag şäherinde işleýän býujet işgärleriniň ençemesi aýlyk zähmet haklarynyň 500-2500 manat aralygyndadygyna ünsi çekip, ýeňillikli ipoteka esasynda satylýandygy aýdylýan jaýlaryň tölegleriniň öz aýlyk girdejilerine gabat gelmeýändigini aýdýar.
“Jaýlaryň ilkinji bäş ýyldaky tölegi aşa ýokary bolmasa-da, ondan soňky ýyllardaky tölegi köp býujet işgäriniň maddy mümkinçiliginden ýokary bolýar. Aýda 1800 manady jaýyň ipotekasyna töläp, galan bölegine gün görmek, maşgala eklemek juda kyn” diýip, mugallym belledi.
Galyberse-de, býujet işgärleri teklip edilýän jaý şertnamasynyň düzgünleriniň hem özlerinde dürli pikirleri döredýändigini aýdýarlar.
Olaryň tassyklamagyna görä, düzgünleriň birinde işgär jaýyň ipoteka tölegini doly tölemezden öň, öz islegi boýunça işden çykan halatynda, şertnamanyň şertini bozanlygy üçin onuň satyn alan jaýy doly yzyna alynýar.
Onda işgäriň geçiren pullarynyň hiç bir böleginiň yzyna gaýdyp berilmejekdigi hem nygtalýar.
“Durmuşda her dürli ýagdaý bolup bilýär, maşgala ýa-da saglyk ýagdaýlary sebäpli, bu ýerdäki jaýyny satyp, ipotekanyň galan bölegini şol satylan jaýyň bahasyndan töläp, başga şähere ýa-da ýurda göçmeli bolup bilýär. Ýöne hökümet hojalyklary bir ýere bagly edip goýmak üçin, ilatyň ýurdy terk etmezligi üçin, raýatlara şeýle düzgünleri bolan şertnamany hödürleýär. Hökümet ilaty ömri ötýänçä döwletiň öňünde bergili edip goýmaga we geljegini seçmez ýaly, özüne hemişe garaşly edip goýmaga çalyşýar” diýip, býujet işgäri belledi.
Azatlyk ýokarda beýan edilen ýagdaýlar barada ýerli häkimiýetlerden, şol sanda Arkadag şäheriniň häkimliginden teswir alyp bilmedi.
Türkmenistanlylaryň, hususan-da, telekeçileriň Arkadag şäherinden täze ýaşaýyş jaýlaryny satyn almaga höweslendirilmegi we mejbur edilmegi barada Azatlygyň habarçylary mundan ozal hem birnäçe gezek habar berdiler.
Geçen ýylyň iýulynda çeşmelerimiz Arkadagdan jaý satyn alan barlykly adamlaryň gazanç çeşmeleriniň derňelmejekdigi, olaryň döwlet salgytlaryndan boşadyljakdygy babatynda wadalar berilýändigini we höweslendirmeleriň teklip edilýändigini aýtdylar.
Aşgabadyň takmynan 25 kilometr töweregi günbatarynda ýerleşýän täze şäher 70 müň ilata niýetlenendir.
Döwlet baştutany Serdar Berdimuhamedowyň kakasy, öňki prezident, häzir Halk maslahatynyň başlygy Gurbanguly Berdimuhamedowyň lakamyny göterýän we gurluşygy 5 milliard dollar boljakdygy mälim edilen bu şäheriň taslamasy iki tapgyrda durmuşa geçirilýär.
Türkmenistanda agyr ykdysady krizisiň dowam edýän wagtynda gurulýan şäheriň birinji tapgyrynyň açylyş dabarasy 2023-nji ýylyň 29-njy iýunynda geçirilip, onuň çäklerinde 336 sany medeni-durmuş we beýleki maksatly desgalar ulanylmaga berildi.
Türkmen häkimiýetleri we mediasy munuň ýurduň çägindäki ilkinji “akylly şäherdigini” ýygy-ýygydan mahabatlandyrýarlar. Ýöne habarçylarymyz we telekeçiler täze şäherdäki jaýlaryň hyrydarynyň tas ýokdugyny aýdyp gelýärler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
