9-njy dekabrda Türkmenistanda daşary ýurtlaryň ýokary bilim hakyndaky diplomlaryny ykrar etmegiň täzelenen tertibi güýje girýär. Ondaky üýtgeşmeler esasan hukuk hünärlerine degişli diýip, türkmen metbugaty habar berdi.
Täze girizilen üýtgeşmeler hukuk hünärleri boýunça bilim alanlardan goşmaça okuwlary, uzak aralykdan öwrenmek ukyplarynyň barlanylmagyny we täze Döwlet synag toparyny göz öňünde tutýar. Hukuk okuw maksatnamasy boýunça okuwlary tamamlanlar Bilim ministrligi we Adalat ministrligi tarapyndan işlenilip taýýarlanylan üç aýlyk okuwlary geçmeli bolarlar.
Adatdan daşary ýagdaýlar sebäpli okuwlaryny onlaýn görnüşinde geçen talyplar elektron bilim tehnologiýalary babatda öz başarnyklaryny görkezmeli bolarlar.
Ýokary kazyýet we hukuk goraýjy edaralaryň wekillerini öz içine alýan ýörite topar hukuk bilimini alanlaryň bilim derejesine baha berer diýip, habarda aýdylýar.
