Фото: эурасиалаw-жоурнал.АҚШ маъмурияти “Толибон” билан “Ал-Қоида” террорчилик ташкилотининг ўлдирилган раҳбари Усама бин Ладеннинг издоши экани айтилаётган шахсни Афғонистонда ҳибсда сақланаётган уч нафар Америка фуқаросига алмаштириш бўйича музокаралар олиб бормоқда. Бу ҳақда The Wall Street Journal (WSJ) нашри
хабар берди.
Нашр маълумотларига кўра, гап АҚШнинг Гуантанамо қамоқхонасида сақланаётган юқори мартабали террорчи Муҳаммад Раҳим ал-Афғоний ҳақида кетмоқда. Тахминларга кўра, ал-Афғоний бин Ладеннинг юқори лавозимли ёрдамчиси бўлган. Байден маъмурияти 14 ноябрь куни толибларга ушбу шахсни 2022 йилдан бери Афғонистондаги қамоқхонада сақланаётган АҚШ фуқаролари Жорж Глезман, Райан Корбетт ва Маҳмуд Ҳабибийга алмаштиришни таклиф этган.
WSJънинг аниқлик киритишича, АҚШнинг амалдаги президенти Жо Байден ҳали бундай айирбошлаш бўйича қарор қабул қилмаган. Шу билан бирга, АҚШ Конгресси Вакиллар палатасининг республикачи аъзоси Майкл Маккол бундай келишувни фойдали эмас деб баҳолаган.
“
Америка раҳбари толибларга шундай юқори мартабали шахсни топшириш орқали танқидга учраши мумкин”, дейилади хабарда.
The Sun нашри аввалроқ Байден Гуантанамодан Яманлик 11 кишини озод қилгани, улардан иккитаси бин Ладеннинг шахсий қўриқчилари экани ҳақида хабар берган эди. Улардан бири Моат Ҳамза Аҳмад ал-Алвий экстремистик қарашларга амал қилишда давом этмоқда. Иккинчиси, Суҳайл Абдул Аном ал-Шарабий 2001 йил 11 сентябрь воқеаларига алоқадорлиги айтилмоқда.
WSJ хабарига кўра, музокаралар июль ойидан бери давом этмоқда. Ушбу маълумот 2024 йилнинг декабрь ойида Оқ уйнинг миллий хавфсизлик бўйича маслаҳатчиси Жейк Салливан иштирокида ўтказилган махфий брифингида қатнашган манбалар томонидан тасдиқланган.
23 декабрь куни Байден ўлим жазосига ҳукм қилинган 37 нафар АҚШ фуқаросини афв этган эди. Уларга тайинланган олий жазо муддатидан илгари озод қилиш имкониятисиз умрбод қамоқ жазоси билан алмаштирилган. Оқ уйнинг ушбу воқеа ҳақидаги баёнотида АҚШнинг амалдаги президенти ўлим жазосига қарши эканлиги айтилган.
АҚШнинг сайланган президенти республикачи Дональд Трамп ўша куниёқ Байденнинг қарорини қаттиқ танқид қилди. У ушбу маҳбуслар қотиллик учун ўлим жазосига ҳукм қилинганини ва уларнинг афв этилиши қурбонларнинг хотирасига ҳурматсизлик эканлигини таъкидлади.
