Трамп яна Канадага АҚШ билан бирлашишни таклиф қилди

АҚШнинг янги сайланган президенти Доналд Трамп Канаданинг АҚШ билан бирлашиши ҳақидаги таклифини такрорлади. «Агар Канада АҚШ билан бирлашса, ҳеч қандай тарифлар бўлмайди, солиқлар сезиларли даражада камаяди ва улар доимо ўзларини ўраб турган Россия ва Хитой кемалари таҳдидидан бутунлай ҳимояланган бўлади. Биргаликда бу қандай буюк давлат бўлар эди» – деб ёзди Оқ уйнинг бўлажак раҳбари 6 январ, душанба куни ўзига тегишли бўлган Truth Social ижтимоий тармоғида.

Шу тариқа, Трамп бир неча соат аввал эълон қилинган Канада бош вазири Жастин Трюдонинг истеъфога чиқиши ҳақидаги хабарга жавоб қайтарди. «Канадада кўп одамлар 51-штат бўлишни яхши кўради. Қўшма Штатлар Канаданинг ўзини сақлаб қолиши учун зарур бўлган йирик савдо камомади ва субсидияларга энди тоқат қила олмайди. Жастин Трюдо буни билиб, истеъфога чиқди», — дейилади унинг хабарида.

Трампнинг партиядошлари Гренландия бўйича ғояга шубҳа билан қараяпти

Республикачилар партиясидан сенаторлар ва Вакиллар палатаси аъзолари АҚШ сайланган президенти Доналд Трампнинг Данияга тегишли Гренландия ва Панама Республикаси юрисдикцияси остидаги Панама каналини ўз назоратига олиш истаги ҳақидаги баёнотларига шубҳа билан муносабатда бўлишди. Бу ҳақда 5 январ куни Американинг The Hill нашри хабар берди.

Нашр манбаларига кўра, Трамп 2021 йилда Оқ уйни тарк этганидан бери бу ғоялар Вашингтонда жиддий муҳокама қилинмаган.

Вакиллар палатаси ташқи ишлар қўмитасининг собиқ раиси Майкл Маккол (Техас штатидан республикачи) қонун чиқарувчилар Трамп ўз президентлигининг бошидаёқ Капитолий тепалигида хавотир уйғотаётган йирик ташқи сиёсий ташаббусларни эълон қилишига тайёр бўлишлари кераклигини айтди.

Бир қатор республикачи қонун чиқарувчилар Трампнинг сўзларини келажакда дипломатияни мустаҳкамлаши мумкин бўлган «музокара» позицияси сифатида кўришларини айтишди.