UzAuto Motors компанияси бош директори ишдан кетди

^{Фото: UzAuto Motors.}
«UzAuto Motors» ва «UzAuto Motors Powertrain» компаниялари бош директори Бо Андерссон лавозимидан озод этилди.

Бугун, 27 декабрь куни ушбу лавозимда 3 йил муддат фолият олиб борган Бо Андерссонни кузатиш маросими бўлиб ўтди. Тадбирда швециялик мутахассиснинг Ўзбекистон автомобил саноати ривожига қўшган хизматлари қайд этилди.

"Ўтган 3,5 йил давомида қилган барча ишларимиз бутун жамоамиз: муҳандислар, менежерлар, ҳунармандлар ва энг муҳими ишчилар меҳнатининг самарасидир. Ишончим комилки, ҳар қандай корхонанинг асоси инсондир. Сўнгги йиллардаги муҳим натижалар қаторида компанияда барчани муваффақиятлари ва натижаларига кўра рағбатлантириш имконини берувчи аниқ ва аниқ KPI тизимини жорий этганимиздан хурсандман", – деган Бо Андерссон.

Андерсон Швеция ҳарбий академияси, Гарвард университети, Стокгольм университети битирувчиси бўлиб, у автомобилсозлик соҳасидаги фаолиятини 1987 йилдан Швециянинг Saab Automobile AB компаниясида бошлаган.

2001-2009 йилларда General Motors’нинг глобал харид бўлинмасига раҳбарлик қилган. 2009 йилдан 2013 йилгача Группа ГАЗ корхонаси, 2014 йилдан 2016 йилгача АвтоВАЗ ОАЖ президенти бўлган. Ўзбекистонда эса 2021 йил иш бошлаганди.