2024-nji ýylyň 19-25-nji dekabry aralygynda Kataryň paýtagty Doha şäherinde ýaş oglan-gyzlaryň arasynda agyr atletika boýunça geçirilen Aziýa çempionatynda türkmen topary ajaýyp netijeleri görkezip, köp medal gazandy diýip, türkmen metbugaty habar berýär.
Türkmenistanly türgenler umumylykda 11 altyn, 8 kümüş we 9 bürünç medal gazandy, Şahzadbek Matýakubow silkip götermekde 219 kg agyrlygy, umumy hasapda 396 kg agyrlygy göterip, ýaşlar kategoriýasynda täze dünýä rekordyny goýdy.
Oguzşat Amanowa (49 kilograma çenli), Anamjan Rustamowa (87 kg çenli) dagy hem gowy netije gazanyp, toparyň ýeňşine saldamly goşant goşdy.
Anamjan Rustamowa Dohada 2023-nji ýylda agyr atletika boýunça geçirilen Gran-pri II ýaryşynda kümüş medaly alypdy.
Mundan öň, bu ýaryşyň çäklerinde türkmen türgenleri, 96 kilograma çenli agramda çykyş eden Şahzadbek Mätýakubow altyn, 67 kilograma çenli agramda çykyş eden Bunýad Raşidow we 81 kilograma çenli agramda çykyş eden Gaýgysyz Töräýew bürünç medallara mynasyp bolupdy.
Bu ýylyň Aziýa çempionatyna 20 ýurtdan 237 türgen gatnaşdy.
Şeýle-de, türkmen türgeni Süleýman Hudaýberdiýewiň Jidda şäherinde 14 ýaşa çenli tennisçileriň arasynda geçirilen halkara tennis ýaryşynda altyn we kümüş medallara mynasyp bolandygy habar berildi.
“Türkmenportal” Süleýmanyň medallaryny häzirki zaman tennis dünýäsiniň iň beýik tennisçileriniň biri Rafael Nadalyň gowşurandygyny habar berdi.
