სლოვაკეთი მზად არის, შემოგვთავაზოს პლატფორმა რუსეთსა და უკრაინას შორის მოლაპარაკებებისთვის, განუცხადა 26 დეკემბერს ჟურნალისტებს რუსეთის პრეზიდენტმა ვლადიმირ პუტინმა ლენინგრადის რეგიონში ევრაზიის უმაღლესი ეკონომიკური საბჭოს სხდომის შემდეგ გამართულ პრესკონფერენციაზე.
პუტინმა ისაუბრა სლოვაკეთის მთავრობის მეთაურ რობერტ ფიცოსთან მოსკოვში გამართულ ბოლო მოლაპარაკებაზე. რუსეთის პრეზიდენტმა აღნიშნა, რომ ფიცომ „უპირველეს ყოვლისა და უმთავრესად ისაუბრა უკრაინის მიმართულებით მშვიდობიანი მოგვარების შესახებ“. პუტინის თქმით, ფიცომ თავისი ქვეყანა შესთავაზა ამგვარი მოლაპარაკებისთვის პლატფორმის სახით.
„ჩვენ წინააღმდეგი არ ვართ, თუკი საქმე აქამდე მივა. ჩვენი აზრით, სლოვაკეთს ნეიტრალურ პოზიცია აქვს და ეს ჩვენთვის მისაღები ვარიანტია“, - დასძინა პუტინმა. მან დარწმუნებით თქვა, რომ „მიისწრაფვის უკრაინაში კონფლიქტის დასრულებისკენ“, მაგრამ იქვე წამოსცდა, რომ რუსეთი „აგრძელებს „სპეციალური სამხედრო ოპერაციის“ (რუს. СВО) მიზნის მიღწევას 2025 წელს“. მოსკოვი СВО-ს უწოდებს უკრაინაში რუსეთის არმიის სრულმასშტაბიან შეჭრას, რომელიც 2022 წლის თებერვლის ბოლოს დაიწყო და დღემდე გრძელდება.
სლოვაკეთის პრემიერ-მინისტრ რობერტ ფიცოს ვიზიტი მოსკოვში 22 დეკემბერს შედგა. მან თავად განაცხადა, რომ მისი ვიზიტი რუსეთში იყო რეაქცია უკრაინის პრეზიდენტის, ვოლოდიმირ ზელენსკის სიტყვებზე, რომ კიევი არ აპირებს უკრაინის ტერიტორიის გავლით რუსული გაზის ტრანზიტის ხელშეკრულების განახლებას, რომელსაც ვადა 2024 წელს ეწურება.
ფიცომ ასევე აღნიშნა, რომ მან და პუტინმა „გაცვალეს აზრები უკრაინაში არსებულ საომარ ვითარებაზე, ომის სწრაფად მშვიდობიანი დასრულების შესაძლებლობაზე და სლოვაკეთსა და რუსეთს შორის ურთიერთობაზე“.
ზელენსკიმ მწვავედ გააკრიტიკა სლოვაკეთის პრემიერ-მინისტრის ჩასვლა პუტინთან. სხვა საკითხებთან ერთად, ზელენსკიმ განაცხადა, რომ ვიზიტით უნდა დაინტერესდნენ „სლოვაკეთის სამართალდამცავი უწყებები და დაზვერვის სამსახურები“. "რატომ არის ეს ლიდერი მოსკოვზე ასე დამოკიდებული, როგორ უხდიან და როგორ იხდის?" - ზელენსკიმ რიტორიკული შეკითხვა დასვა და აღნიშნა, რომ ფიცოს ქმედებებმა შეიძლება საფრთხე შეუქმნას არა მხოლოდ სლოვაკეთის, არამედ მთელი ევროპის უსაფრთხოებას.
უკრაინის ნატოში გაწევრიანების თემაზე, 26 დეკემბერს პუტინმა განაცხადა, რომ აშშ-ს პრეზიდენტმა ჯო ბაიდენმა ალიანსს ჯერ კიდევ 2021 წელს შესთავაზა, რომ უკრაინის ამ ორგანიზაციაში შესვლა 10-15 წლით გადაედო „კიევის მოუმზადებლობის გამო“. ”ეს საიდუმლო არ არის”, - თქვა პუტინმა, უპასუხა რა კითხვას იმაზე, რას ამბობენ აშშ-ში პრეზიდენტად არჩეული დონალდ ტრამპის ახალი გუნდის წევრები კონფლიქტის გაყინვის შესაძლებლობაზე იმ პირობით, თუ ნატოში უკრაინის გაწევრიანება გადაიდება.
არჩევნებში გამარჯვების წინ ტრამპმა პირობა დადო, რომ დაასრულებდა უკრაინაში ომს „24 საათში“ და იანვარში ინაუგურაციამდეც კი, მაგრამ დეტალები არ გაუმხელია.
The Wall Street Journal-ის თანამოსაუბრეების თქმით, 7 დეკემბერს პარიზში გამართულ შეხვედრაზე დონალდ ტრამპმა უკრაინისა და საფრანგეთის პრეზიდენტებს განუცხადა, რომ არ უჭერს მხარს ნატოში უკრაინის გაწევრიანებას, მაგრამ საომარი მოქმედებების შეწყვეტის შემდეგ სურს ნახოს ძლიერი და კარგად შეიარაღებული უკრაინა.
26 დეკემბერს ვლადიმირ პუტინი ასევე დაიმუქრა, რომ უკრაინაზე თავდასხმების დროს გამოიყენებს უფრო მძლავრ საშუალო სიშორის იარაღს, მათ შორის "ორეშნიკს", თუ რუსეთის ხელისუფლება „დაინახავს, რომ ასეთი გამოყენება აუცილებელია“. „მაგრამ ჩვენ არ ვჩქარობთ... მე ვთქვი, რომ ჩვენ ჯერ კიდევ ცოტა გვაქვს "ორეშნიკი“, - დასძინა პუტინმა პრესკონფერენციაზე. მისი თქმით, მოსკოვი ყოველთვის შესაბამისად უპასუხებს რუსეთის ტერიტორიაზე თავდასხმას. პუტინმა თქვა, რომ მათ გამოიყენეს ხუთი-შვიდი ამერიკული რაკეტა ATACAMS-ი, ”რუსეთის არმიამ უპასუხა ყოვლისმომცველი დარტყმით - 221 თუ 240 დარტყმით”.
