აზერბაიჯანში 26 დეკემბერი გლოვის დღედ გამოცხადდა, ერთი დღით ადრე მომხდარი ავიაკატასტროფის მსხვერპლთა ხსოვნისთვის პატივის მისაგებად. 25 დეკემბერს აზერბაიჯანის ავიახაზების თვითმფრინავი ყაზახეთში ჩამოვარდა, რასაც ბორტზე მყოფი 67 ადამიანიდან 38 ემსხვერპლა. ყაზახეთის წარმომადგენელთა განცხადებით, კატასტროფას გადაურჩა 29 ადამიანი.
Embraer 190-ის ტიპის თვითმფრინავი აზერბაიჯანის დედაქალაქიდან, ბაქოდან მიფრინავდა რუსეთის ჩეჩნეთის რეგიონის დედაქალაქ გროზნოში, როცა მას სასწრაფო წესით მოუწია დაშვება დასავლეთ ყაზახეთში, ქალაქ აქთაუსთან ახლოს - აცხადებს ავიაკომპანია.
აზერბაიჯანის და ყაზახეთის წარმომადგენლებმა გამოძიება დაიწყეს კატასტროფის მიზეზის დასადგენად, რომელიც ჯერჯერობით გაურკვეველი რჩება. იუწყებიან, რომ კატასტროფის ადგილზე აღმოჩენილია პილოტების კაბინის ჩანაწერი.
ბორტზე მყოფებს შორის იყვნენ აზერბაიჯანის 42 მოქალაქე, რუსეთის 16, ყაზახეთის ექვსი და ყირგიზეთის სამი მოქალაქე.
ყაზახეთის მთავრობის გამოძიებას უძღვება ვიცე-პრემიერი, ყანათ ბოზუმბაევი - მისი განცხადებით, დაღუპულთაგან ბევრი პირის ამოცნობა ჯერჯერობით არ ხერხდება მასშტაბური დამწვრობების გამო.
29 გადარჩენილს აქვს საშუალო და მძიმე დაზიანებები, მათ შორის დამწვრობები. გადარჩენილი მგზავრები საავადმყოფოში არიან მოთავსებული.
