Путин МДҲ давлатлари раҳбарлари билан учрашади

^{Фото: kremlin.ru}
Россия президенти Владимир Путин шу ҳафта МДҲ давлатлари раҳбарлари норасмий саммитини, Олий Евросиё иқтисодий кенгаши йиғилишини ва Тожикистон президенти Эмомали Раҳмон билан музокаралар ўтказади. Бу ҳақда президент ёрдамчиси Юрий Ушаков маълум қилди.

Барча тадбирлар Ленинград вилоятидаги “Игора” тоғ чанғи курортида бўлиб ўтади. Путин 24 декабрь куни Эмомали Раҳмон билан савдо, хавфсизлик, маданият ва гуманитар масалалар бўйича икки томонлама муносабатларнинг асосий жиҳатларини муҳокама қилади.

Миграция муаммоларига, шунингдек, 2024 йилда Россиянинг МДҲга раислиги ва 2025 йилда Тожикистоннинг бўлажак раислигига алоҳида эътибор қаратилади. Афғонистондаги вазият ва бошқа минтақавий масалаларни муҳокама қилиш режалаштирилган, дейилади хабарда.

25 декабрь куни МДҲ давлат раҳбарларининг анъанавий норасмий учрашуви бўлиб ўтади. Путин 2024 йилда Россия раислиги якунларини сарҳисоб қилади ва норасмий вазиятда МДҲ ва бошқа халқаро ташкилотлар доирасидаги ҳамкорлик масалаларини муҳокама қилади.

26 декабрь куни “Игора”да Олий Евросиё иқтисодий кенгашининг йиғилиши бўлиб ўтади, унда Евросиё иқтисодий иттифоқи (ЕОИИ) доирасида интеграцияни чуқурлаштириш масалалари муҳокама қилинади. Тадбирда Қозоғистон, Беларусь, Қирғизистон ва Ўзбекистон президентлари, шунингдек, Куба вакиллари иштирок этади. Умумий газ ва нефть бозорини яратиш, шунингдек, 2025 йилга мўлжалланган режалар, шу жумладан Эронга ЕОИИда кузатувчи давлат мақомини бериш масалалари муҳим мавзулар бўлади.