ევროსაბჭოს საპარლამენტო ასამბლეის (PACE) პრეზიდენტი თეოდოროს რუსოპულოსი საქართველოს პრემიერ-მინისტრს აკრიტიკებს პრეზიდენტ სალომე ზურაბიშვილისადმი „მუქარის“ გამო და მას განცხადების უკან წაღებისკენ მოუწოდებს.
„მინდა შევახსენო პრემიერ-მინისტრ ირაკლი კობახიძეს, რომ მისი ქვეყანა ევროპის საბჭოს წევრია. პირდაპირი მუქარა, რაც მან ზურაბიშვილისადმი განახორციელა, - 29 დეკემბერს მისი უფლებამოსილების ვადის ამოწურვის შემდეგ დაპატიმრების შესახებ, - მიუღებელია და ეწინააღმდეგება დემოკრატიისა და კანონის უზენაესობის პრინციპებს“, - წერს რუსოპულოსი X-ზე.
„მოვუწოდებ პრემიერ-მინისტრ ირაკლი კობახიძეს, უკან გაიხმოს ეს განცხადება და შესაბამისობაში მოვიდეს ევროსაბჭოს პრინციპებთან, რომლებსაც პატივი უნდა სცეს“, - მიმართავს რუსოპულოსი კობახიძეს.
ირაკლი კობახიძემ 22 დეკემბრის პრესკონფერენციაზე განაცხადა, რომ სალომე ზურაბიშვილი 29 დეკემბრის შემდეგ შეიძლება ციხეში მოხვდეს, თუკი ის პრეზიდენტის რეზიდენციაში „გამაგრდა“ და „სისხლის სამართლის დანაშაული“ ჩაიდინა:
„72 წლის ქალის ციხეში გაშვება შესაძლოა არავის მოუნდეს, მაგრამ ასეთი ქმედებით ის გაწირავს ყველა იმ ადამიანს, ვინც მასთან ერთად იქნება, - თქვა ირაკლი კობახიძემ და დასძინა, - ვნახოთ, სად გააგრძელებს ცხოვრებას, გისოსებს მიღმა თუ გარეთ. მგონია, მას ეყოფა გონიერება, არ დაარღვიოს სისხლის სამართლის კოდექსის ნორმები“.
კობახიძის ამ განცხადების შემდეგ, სალომე ზურაბიშვილმა, წინა დღეს გამოცხადებული გეგმის თანახმად, თბილისში მასობრივ საპროტესტო დემონსტრაციას მიმართა.
სალომე ზურაბიშვილმა თქვა, რომ პრეზიდენტის სასახლეში იწვევს ბიძინა ივანიშვილს, რათა ერთად მოიფიქრონ ახალი საპარლამენტო არჩევნების თარიღი.
„მოვიდეს სასახლეში ივანიშვილი და მე მზად ვარ, დავსხდეთ და მოვიფიქროთ, როგორ უნდა დაინიშნოს არჩევნები. არჩევნების რიცხვი შეთანხმებული უნდა იყოს 29 რიცხვამდე“, - განაცხადა პრეზიდენტმა.
