აშშ-ის სახელმწიფო დეპარტამენტმა თავის მოქალაქეებს მოუწოდა, დაუყოვნებლივ დატოვონ ბელარუსი. ამის შესახებ ლაპარაკია ამერიკელებისთვის გამოცემულ რეკომენდაციაში.
„ბელარუსის ხელისუფლების მიერ ადგილობრივი კანონების თვითნებურად გამოყენებისა და დაკავების საფრთხის, უკრაინის წინააღმდეგ რუსეთის ომში მხარდაჭერის, ასევე რეგიონში გაზრდილი არასტაბილურობისა და არაპროგნოზირებადი ვითარების გამო, არ იმოგზაუროთ ბელარუსში,“ ნათქვამია უწყების განცხადებაში.
ბელარუსში მყოფ აშშ-ის მოქალაქეებს ურჩევენ, მოერიდონ საჯარო დემონსტრაციებს. გარდა ამისა, სახელმწიფო დეპარტამენტი ამერიკელებს მოუწოდებს, ყურადღება მიაქციონ საკუთარ ელექტრონულ მოწყობილობებს, ვინაიდან ინფორმაცია, რომელსაც ისინი შეიცავს, შეიძლება მათი დაკავების საფუძველი გახდეს.
„აშშ-ის მოქალაქეებმა რეგულარულად უნდა განიხილონ ქვეყნის დატოვების შესაძლო გეგმები საგანგებო ვითარების წარმოქმნის შემთხვევისთვის. მეზობელ ქვეყნებთან სასაზღვრო-გამშვები პუნქტები ზოგჯერ გაუფრთხილებლად იკეტება,“ აღნიშნავს აშშ-ის სახელმწიფო დეპარტამენტი.
აშშ-მა მინსკში თავისი საელჩოს მუშაობა 2022 წლის 28 თებერვალს შეაჩერა. აშშ-ის მოქალაქეები, რომლებიც ბელარუსში იმყოფებიან და საკონსულო მომსახურება ესაჭიროებათ, უნდა ეცადონ, რაც შეიძლება სწრაფად დატოვონ ქვეყანა და მიმართონ აშშ-ის საელჩოს ან საკონსულოს სხვა ქვეყანაში, ნათქვამია განცხადებაში.
