Жамбыл облысының әкімі Ербол Қарашөкеев мектеп және колледж ұстаздарымен кездесіп, білім беру саласындағы өзекті мәселелерді талқылады.
Облыс әкімі еліміздің жарқын болашағы үшін аянбай тер төгіп жүрген ұстаздарға алғысын білдірді.
— Ұстаздық өте жауапты, ел дамуы мен болашағына елеулі үлес қосатын мамандық иесі. Ұлы Абай «Адамның адамшылығы – жақсы ұстаздан» деп мұғалімнің тәрбиесі мен өнегесі шәкірт болашағының түп қайнары екеніне көңіл аударған. Расында, жақсы ұстаздан тәлім-тәрбие алған баланың болашағы жарқын болары анық.
Мемлекет басшысы Қасым-Жомарт Кемелұлы Тоқаев білім саласының сапасын арттырып, заман талабына сай болуына жіті назар аударып келеді. Бұл маңызды бағыт бойынша өңірде де ілкімді істер атқарылуда, — деді облыс әкімі.
Ербол Қарашөкеев мектеп оқушылары мен ұстаздардың толайым жетістіктеріне тоқталып өтті.
Өңірде «Қазақстанның еңбек сіңірген ұстазы» құрметті атағын иеленген 6 педагог бар, оның үшеуі бұл жоғары марапатқа биыл ие болды.
Ағымдағы жылы халықаралық, республикалық бәсекелерде 71 педагог жеңімпаз атанды. Белгілі ғалым Асқар Жұмаділдаев атындағы және IMPACT ашық шығармашылық байқауында өңір ұстаздары командалық есепте республикада I орынды, республикалық «Математикалық регата» байқауында командалық ІІІ орынды иеленді. «Үздік әдіскер», «Үздік сынып жетекші» сайыстарында топ жарды. Сондай-ақ 8 педагог «Үздік авторлық бағдарлама» байқауының жеңімпазы атанды.
Аймақта соңғы 13 жылда «Үздік педагог» атағын иеленген 51 педагогтің он тоғызы ауыл мектептерінде қызмет етеді.
Республикалық ғылыми жобалар жарысында облыс командасы 15-ші жыл қатарынан «Ең үздік команда» атағын жеңіп алса, республикалық олимпиадада «Үздік олимпиадалық команда» деп танылды. Еліміз бойынша PISA зерттеуінің қорытындысына сәйкес І орынды иеленді.
Кездесу барысында Ербол Қарашөкеев білім беру саласындағы елеулі жетістіктері үшін бірқатар педагогті марапаттады.
Атап айтқанда, «Үздік педагог-2024» республикалық байқауының облыстық кезеңінің 6 жеңімпазына қаржылай сертификат (300 АЕК көлемінде) берілді.
5 мұғалім «Жамбыл облысының білім беру саласына қосқан үлесі үшін» құрметті атағы мен төсбелгісінің иегері атанды. Олар да арнайы сертификатқа ие болды.
Жиналғандарға облыс әкімінің құттықтау хаты табыс етілді.
Басқосу барысында «Қазақстанның еңбек сіңірген ұстазы» атағының иегері, облыстық дарынды балаларға арналған мамандандырылған «Дарын» мектеп-интернатының география пәнінің мұғалімі Наталья Волотько, республикалық «Үздік педагог-2024» байқауының жеңімпазы, Шу ауданы С. Сейфуллин атындағы орта мектептің биология пәнінің мұғалімі Мереке Кенжебекова сөз сөйледі.
Сообщение Жамбылдық 71 педагог халықаралық, республикалық бәсекелерде жеңімпаз атанды появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.
