Türkmenistanyň prezidenti Serdar Berdimuhamedow 16-njy dekabrda ýokary derejeli oba hojalyk resmisi bilen hem-de welaýat häkimler bilen sanly ulgam arkaly iş maslahatyny geçirip, bu toplumda alnyp barylýan işlere garady. Ýygnakda pagta plan borçnamasynyň ýerine ýetirilip-ýetirilmändigi agzalmady.
“Türkmenistanyň hronikasy” neşiri bu ýagdaýa ünsi çekip, adatça, Türkmenistanda pagta plan borçnamasy boýunça hasabatyň noýabr aýynyň ilkinji ongünliginde berilýändigini ýatladýar.
Welaýat häkimleri iş maslahatynyň dowamynda ýurduň ähli sebitlerinde pagta öndürijiler bilen hasaplaşyklary öz wagtynda geçirmek boýunça zerur çäreleriň görülýändigini aýtdylar.
Türkmenistan şu ýyl 10-njy noýabrda Hasyl toýuny toýlady. Türkmen metbugaty bu çäräniň fonunda ýurduň iň az möçberde pagta ýetişdirýän Balkan welaýatynda plan borçnamasynyň üstünlikli ýerine ýetirilendigini habar berdi. Türkmenistanyň döwlet habarlar agentligi bu sebitde 16 müň tonnadan gowrak “ak altynyň watan harmanyna tabşyrylandygyny” aýtdy.
Ýöne bu habardan öň-de, soň-da ýurt boýunça plan borçnamasynyň ýerine ýetirilip-ýetirilmändigi agzalmady.
Soňky sapar welaýat häkimleri we oba hojalyk resmileri bilen 2-nji dekabrda geçirilen iş maslahatynda ýurduň gowaça meýdanlarynda ýetişdirilen pagta hasylynyň “iň soňky hanasyna” çenli ýygnalyp alynýandygy habar berildi.
Azatlyk Radiosynyň habarçylary dekabr aýynyň birinji hepdesinde pagtaçy kärendeçiler bilen hasaplaşyk işleriniň geçirilip başlanandygyny habar berdiler. Şonda daýhanlar özleriniň ýyllyk girdejilerini lükgeligine nagtlaşdyrmakda kynçylyk çekdiler.
Türkmenistanda 2024-nji ýylyň hasylyndan başlap pagtanyň döwlet satyn alyş nyrhy 3,5 esse ýokarlandy. Döwlet daýhanyň harmana tabşyran pagta hasylyna öňküsinden 350 göterim has köp mukdarda töleg tölemegi wada berdi.
Nah pagtanyň tonnasy 1355-1500 manat aralygynda bolanlygyndan, ýygnalan möwsümine we hiline görä, 4550-5000 manada çykdy.
Ýüpek pagtanyň tonnasy 1820-2000 manat bolanlygyndan, şu ýylyň hasylyndan başlap, 6100-6700 manada çykdy.
Iki hepde ozal, ýurduň dürli sebitlerinde habarçylarymyz bilen gürrüňdeş bolan kärendeçi daýhanlar özleriniň bank kartlaryndan her günde 800 manat möçberinde pul nagtlaşdyryp bilýändiklerini, ýyllyk girdejileriniň ählisini nagtlaşdyrmak üçin, birnäçe günläp bankomatlara gatmaga mejbur bolýandyklaryny habar berdiler.
Türkmenistanda ýylda 580 müň gektardan gowrak meýdana gowaça ekilip, soňky ýyllarda üýtgewsiz 1 million 250 müň tonna pagta hasylyny ýygnap almak meýilleşdirilýär.
Ýöne öňki ýyllardan tapawutlylykda, döwlet metbugaty sebitlerde pagta plan borçnamasynyň ýerine ýetirilişi barada berýän habarlaryny soňky ýyllarda seýrekleşdirdi.
Azatlyk Radiosynyň Mary welaýatyndaky habarçylary bu sebitde dekabryň ikinji hepdesinde pagta möwsüminiň tamamlanyp, geljek ýylyň hasylyna niýetlenýän gowaça meýdanlarynda sürüm işleriniň geçirilip başlanandygyny habar berdiler.
Sürüme çekilýän oba hojalyk tehnikalary dizel ýetmezçiliginden ejir çekdi. Mehanizatorlar we kärendeçileri özlerine bölünip berilýän dizel ýangyjynyň sebitde ýerli resmiler tarapyndan eden-etdilikli paýlanýandygyny aýtdylar.
Türkmenistanyň prezidenti 6-njy dekabrda geçiren hökümet mejlisinde hem ýanwar-noýabr aýlary aralygynda oba hojalyk toplumynda ýerine ýetirilen işleriň hasabaty bilen tanyşdy. Bu ýygnakda hem üstümizdäki ýylda plan borçnamasynyň ýerine ýetirilip ýetirilmändigi aýdylmady,
Türkmenistanyň hökümeti ynsan hukuklaryny goraýjy guramalar tarapyndan pagtaçylyk pudagynda mejbury zähmetden peýdalanmakda tankyt edilýär.
Şu ýyl pagta möwsümi başlanan gabatlary, türkmen metbugaty ýurtda ýetginjeklere pagta ýygdyrylmagyny gadagan edýän kanunçylygyň güýje girendigini habar berdi. Muňa garamazdan, ýurduň gowaça meýdanlarynda mejbury zähmet bilen bagly aladalar dowam etdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
