პროევროპული დემონსტრაციების პარალელურად, თბილისში იმყოფებოდა რუსეთის „სამართალდამცავთა პროფკავშირების ასოციაციის“ ხელმძღვანელი ალექსეი ლობარევი - ის ფეისბუკსა და „ვკონტაქტეში“ თბილისიდან ფოტოებს აქვეყნებს და წერს, რომ საქართველოში იყო „კოლეგების მიწვევით“, „სამუშაო ვიზიტით“.
იგი თბილისში, სავარაუდოდ, იმყოფებოდა 28 ნოემბრიდან 9 დეკემბრამდე პერიოდში, - თუმცა ზუსტად რა დროით, უცნობია.
გამოქვეყნებულ ფოტოებში, რომლებშიც თავადაც ჩანს, ის რუსთაველის გამზირზე დემონსტრაციისას იმყოფება; აქვეყნებს ასევე მარჯანიშვილის გამზირზე პოლიციელებთან და პოლიციის შენობასთან გადაღებულ ფოტოებს.
„ქართველების უმეტესობა საპროტესტო აქციების მონაწილეების მიმართ ნეგატიურად არის განწყობილი“, - ასე აღწერს ის თავის დაკვირვებას თბილისიდან.
ლობარევი ასევე წერს, რომ მისი დაკვირვებით, ქვეყანაში რუსეთისადმი დამოკიდებულება საგრძნობლად გაუმჯობესდა:
„რუსეთისადმი დამოკიდებულება საქართველოში ბოლო თვეებში მნიშვნელოვნად შეიცვალა პოზიტიური მიმართულებით. ქუჩებში, ბაზრობებზე, მაღაზიებსა და კაფეებში თავისუფლად ვლაპარაკობდი რუსულად, ყველას ესმოდა ჩემი და ყველა რუსულად მპასუხობდა“.
იგი წერს, რომ ქართველმა პოლიციელებმა „ექსტრემალურ ვითარებაში ღირსეულად წარმოაჩინეს თავი“, საუბრობს მათ რიგებში დაშავებულებზე და დემონსტრანტებს „ბოევიკების ორგანიზებულ ჯგუფებს“ უწოდებს.
ლობარევი წლებია, ჩნდება რუსულ მედიაში, როგორც პროფკავშირების ასოციაციის თავმჯდომარე. აძლევს ინტერვიუს სხვადასხვა გამოცემას თუ ტელევიზიას, მათ შორის lenta.ru-ს - პოლიციის რიგებში დეფიციტზე 2023 წელს.
როგორც ლობარევის ფეისბუკის გვერდზე გამოქვეყნებული ფოტოებიდან ირკვევა, ის წელს პირველად არ ყოფილა საქართველოში - მის გვერდზე იძებნება საპატრულო ეკიპაჟთან ერთად გადაღებული ფოტო, რომელიც 2019 წელსაა გამოქვეყნებული.
რადიო თავისუფლებამ ლობარევს ფეისბუკის მეშვეობითაც მისწერა, კონკრეტულად ვისი მოწვევით იმყოფებოდა საქართველოში და რა მიზნით.
ამასთან, რადიო თავისუფლებას საქართველოს პროფკავშირების გაერთიანებაში უპასუხეს, რომ წლებია რუსეთთან არავითარი ურთიერთობა არ აქვთ და შესაბამისად, მათ არაფერი აკავშირებთ ლობარევის საქართველოში ყოფნასთან. მათივე ინფორმაციით, საქართველოში არაა რეგისტრირებული არც მოქმედი და არც ყოფილი სამართალდამცველების პროფკავშირული გაერთიანება.
