ამერიკის შეერთებული შტატების სახელმწიფო დეპარტამენტმა სავიზო შეზღუდვები დაუწესა საქართველის კიდევ ოცამდე მოქალაქეს, რომელთა შორის არიან მინისტრები, პარლამენტის წევრები, სამართალდამცავი უწყებების და უსაფრთხოების სამსახურის ჩინოსნები და კერძო პირები.
მათი ვინაობა დაკონკრეტებული არ არის.
სახელმწიფო დეპარტამენტის საიტზე 12 დეკემბერს გამოქვეყნებული განცხადებით, ვიზების გაცემა აიკრძლა მათთვის, ვინც პასუხისმგებელი, ან თანამონაწილეა საქართველოში დემოკრატიისთვის ძირის გამოთხრაში.
შეერთებული შტატები მკაცრად გმობს „ქართული ოცნების" სასტიკ და გაუმართლებელ ძალადობას საქართველოს მოქალაქეების, მათ შორის საპროტესტო აქციების მონაწილეების, მედიის წარმომადგენლების, უფლებადამცველებისა და ოპოზიციის წარმომადგენლების მიმართ.
სახელმწიფო დეპარტამენტის განცხადებით, „ქართულმა ოცნებამ“ ზურგი აქცია საქართველოს ევროატლანტიკურ მომავალს, რომელიც ქართველი ხალხის უმრავლესობას სურს და საქართველოს კონსტიტუციითაა გათვალისწინებული:
„ჩვენ ვამზადებთ დამატებით ქმედებებს, მათ შორის სანქციებს, რათა პასუხი აგონ მათ, ვინც ძირს უთხრის დემოკრატიას საქართველოში. ქართველ ხალხთან ერთად გვინდა ვიხილოთ ძლიერი, აყვავებული და დემოკრატიული საქართველო, რომელიც ევროატლანტიკურ საზოგადოებაში მტკიცედ იქნება ინტეგრირებული. ჩვენი დღევანდელი ქმედებები აჩვენებს ამერიკის გადაწყვეტილებას და ემატება აქამდე გამოცხადებულ ნაბიჯებს, რომლებიც შეეხო „ქართულ ოცნებასთან“ დაკავშირებულ 100-ზე მეტ პირს და მათი ოჯახის წევრებს".
ამერიკის შეერთებულმა შტატებმა „ქართული ოცნების“ ხელისუფლების წარმომადგენლებს და მათი ოჯახის წევრებს სავიზო სანქციები დაუწესა 2024 წლის ივნისშიც, ე.წ. აგენტების კანონის მიღების შემდეგ.
თვეების განმავლობაში, ე.წ. აგენტების კანონის და „ქართული ოცნების" წარმომადგენლების ანტიდასავლური, ყალბ ბრალდებებზე დაფუძნებული რიტორიკის გამო, შეერთებულმა შტატებმა საქართველოს ხელისუფლებას არაერთხელ მოუწოდა ევროპული და ევროატლანტიკური ინტეგრაციის გზაზე დაბრუნება, ნოემბერში კი საქართველოსთან სტრატეგიული პარტნიორობა შეაჩერა.
სახელმწიფო დეპარტამენტმა გადაწყვეტილება 30 ნოემბერს გამოაცხადა მას შემდეგ, რაც ორი დღით ადრე „ქართული ოცნების" ხელისუფლებამ გადაწყვიტა, 2028 წლის ბოლომდე დღის წესრიგში არ დააყენოს ევროკავშირში გასაწევრიანებლად მოლაპარაკების გახსნის საკითხი, ამის გამო ქვეყანაში დაწყებული საპროტესტო აქციების მონაწილეთა წინააღმდეგ კი ძალის გამოყენება დაიწყო.
