საფრანგეთისა და პოლონეთის პრეზიდენტები უკრაინაში მშვიდობისდამცველთა გაგზავნას განიხილავენ - მედია
Rzeczpospolita-ს ინფორმაციით, ვარშავა და პარიზი განიხილავენ პოტენციურ 40 000-კაციან მისიას, რომელიც სხვადასხვა ქვეყნის სამხედროებისგან შედგება. გამოცემის თანამოსაუბრეებს არ დაუკონკრეტებიათ, ევროკავშირის რომელი ქვეყნებიდან შეიძლება ჩავიდნენ სამხედროები უკრაინაში. სავარაუდო სამშვიდობო მისია უკრაინაში ცეცხლის შეწყვეტას და შესაძლო დარღვევებს დააკვირდება.
ამავე დროს, პოლონეთის ერთ-ერთმა მაღალჩინოსანმა Politico-სთან საუბარში აღნიშნა, რომ ვარშავა გაოცებული იყო მაკრონის წინადადებით. გამოცემის თანამოსაუბრის თქმით, სამშვიდობო მისიების შექმნის საკითხები გაეროსა და ეუთოს ფარგლებში უნდა გადაწყდეს და არა ორი ქვეყნის პრეზიდენტების განხილვის დროს.
მანამდე მაკრონმა უკრაინაში მიმდინარე ომის დროს სამხედრო ინსტრუქტორების გაგზავნის იდეა გამოთქვა. Rzeczpospolita ასევე აღნიშნავს, რომ საფრანგეთის პრეზიდენტმა, დიდი ალბათობით, სამშვიდობო მისიის იდეა აშშ-ის არჩეულ პრეზიდენტ დონალდ ტრამპთან და უკრაინის პრეზიდენტ ვოლოდიმირ ზელენსკისთან შეხვედრაზე გასულ შაბათს განიხილა პარიზში.
ზელენსკი მაკრონს და აშშ-ის არჩეულ პრეზიდენტ დონალდ ტრამპს 7 დეკემბერს შეხვდა პარიზში. მაკრონის წინადადების შესახებ მან ორშაბათს ახსენა კიევში გერმანიის ოპოზიციური ბლოკის, CDU/CSU-ს ლიდერ ფრიდრიხ მერცთან შეხვედრაზე.
ზელენსკის სიტყვებიდან გამომდინარეობს, რომ მაკრონი ემხრობა ქვეყანაში უცხოური სამხედრო კონტინგენტის განთავსებას უსაფრთხოების გარანტის სახით, სანამ უკრაინა ნატოში გაწევრიანდება. ზელენსკიმ არ დააკონკრეტა, რომელ ქვეყანაზე შეიძლება იყოს საუბარი, მაგრამ მაკრონი ადრე არ გამორიცხავდა ფრანგი სამხედროების უკრაინაში გაგზავნას.