„ქართული ოცნება“ ამბობს, რომ პარტიის თავმჯდომარე ირაკლი ღარიბაშვილმა „ვარჯიშისას მხარი დაიზიანა“, „მცირე სამედიცინო დახმარება“ დასჭირდა და ამიტომ იმყოფებოდა „ამერიკულ ჰოსპიტალში“.
„მთავარმა არხმა“ გაავრცელა ინფორმაცია, რომ ირაკლი ღარიბაშვილი „ამერიკულ ჰოსპიტალში“ გადაიყვანეს და „ვრცელდება ცნობები ოლიგარქის გუნდში სავარაუდო ფიზიკური დაპირისპირების შესახებ“.
10 დეკემბერს ბიძინა ივანიშვილთან წარსულში დაახლოებულმა გიორგი ბაჩიაშვილმა, - რომელსაც მედია მის „პირად ბანკირს“ უწოდებდა და რომლის წინააღმდეგაც საქმეა აღძრული ბიტკოინებთან დაკავშირებით, - განაცხადა, რომ ირაკლი ღარიბაშვილი „ორ კვირაზე მეტია, არ გამოჩენილა ოფისში“.
„დღეს ხმა გამოვიდა, რომ ტრავმატოლოგიურში იყო სხვადასხვა დაზიანებით. არ ვიცი, რას უკავშირდება, მაგრამ საიდუმლოებით მოცული ამბავია“, - უთხრა მან ტელეკომპანია „პირველს“.
რადიო თავისუფლების წყაროს ცნობით, ღარიბაშვილმა „ამერიკულ ჰოსპიტალში“ გაიარა კონსულტაცია ტრავმატოლოგთან - მას დაბეჟილობა აღენიშნებოდა.
11 დეკემბერს „ქართულმა ოცნებამ“ ტელეკომპანია „რუსთავი 2-ს“ განუცხადა, რომ ცნობები ღარიბაშვილის მიმართ ფიზიკურ ანგარიშსწორებაზე „დეზინფორმაცია“ და საზოგადოების შეცდომაში შეყვანის უსუსური მცდელობაა.
„სინამდვილეში, „ქართული ოცნების“ თავმჯდომარემ ვარჯიშის დროს დაიზიანა მხარი და დასჭირდა მცირე სამედიცინო დახმარება“, - ამბობენ პარტიაში.
ექსპრემიერი ირაკლი ღარიბაშვილი „ქართული ოცნების“ საარჩევნო სიის მესამე ნომერი იყო - ბიძინა ივანიშვილისა და ირაკლი კობახიძის შემდეგ.
10 დეკემბერს პარლამენტის სხდომაზე „ქართული ოცნების“ უმრავლესობა დაეთანხმა რვა თანაგუნდელის მოთხოვნას, გაუქმებოდათ მეთერთმეტე მოწვევის პარლამენტის სადეპუტატო მანდატები. მათ შორის, ივანიშვილთან ერთად, ირაკლი ღარიბაშვილიც იყო.
მათი უმრავლესობა, ვისაც მანდატი გაუუქმდა, სხვა თანამდებობაზე აგრძელებს მუშაობას. მაგალითად:
ირაკლი კობახიძე - პრემიერ-მინისტრად; მაკა ბოჭორიშვილი - საგარეო საქმეთა მინისტრად; ანრი ოხანაშვილი - იუსტიციის მინისტრად; დავით სონღულაშვილი - გარემოს დაცვისა და სოფლის მეურნეობის მინისტრად; მარიამ ქვრივიშვილი - ეკონომიკის მინისტრის მოადგილედ; მიხეილ ყაველაშვილი კი „ქართული ოცნების“ პრეზიდენტობის კანდიდატია.
წინა პერიოდში ოპოზიციურ მედიაში გავრცელდა ინფორმაცია, რომ ღარიბაშვილმა დატოვა პარტია.
„ირაკლი ღარიბაშვილი აგრძელებს მუშაობას“, - აცხადებენ ახლა პარტიაში.
