د روسیې ولسمشر وايي، د اورشنیک په نوم د توغندیو هغه سیستم به، چې په دې وروستیو کې په اوکراین کې وازمویل شو، په بېلاروس کې ځای پرځای شي.
ولادیمیر پوتین پرون د بیلاروس په پلازمېنه مینسک کې د روسیې او بېلاروس د عالي دولتي شورا غونډې ته د خبرو پر مهال وویل چې اورشنیک سیستم د راروان ۲۰۲۵م کال تر دوهمې نیمايي پورې په بېلاروس کې نصبېدلای شي.
دې پرېکړې ته د مسکو د پوځي ستراتیژۍ او له بېلاروس سره د روسیې په اړیکو کې د یوه نوي پړاو په سترګه کتل کېږي او د دې دواړو هېوادونو ترمنځ د پوځي همکاریو د پیاوړتیا څرګندونه کوي، خو له بلې خوا په ختیځه اروپا کې د روسیې د پل د پراخېدو نښه هم ده.
