Prezidentlige kandidat Jorjesku baradaky resminamalar aýan edildi

Rumyniýanyň Milli goranmak geňeşi 24-nji noýabrda geçirilen prezident saýlawlarynyň birinji tapgyrynda garaşylmadyk ýagdaýda ýeňiş gazanan sagçy kandidat Kelin Jorjeskunyň saýlaw kampaniýasy bilen baglanyşykly resminamalaryny ýaşyrynlykdan çykardy. Derňewiň jikme-jikliklerini Azat Ýewropa/Azatlyk radiosynyň Rumyn gullugy tarapyndan çap etdi.


Resminamalardan görnüşine görä, birinji tapgyrdan öň geçiren saýlaw kampaniýasy döwründe Jorjeskuny on müňlerçe TikTok hasaby goldapdyr. Derňew olaryň arasynda 2006-njy ýylda döredilen hasaplaryň hem bardygyny görkezýär.


 Rumyniýanyň aňtaw gullugynyň maglumatyna görä, Jorjeskunyň agressiw kampaniýasy sosial media algoritmlerini ulanmak arkaly amala aşyrylypdyr we bu ýagdaý onuň meşhurlygyny kesgin ýokarlandyrmak mümkinçiligini beripdir. Kampaniýanyň işjeň tapgyry saýlaw gününden takmynan iki hepde öň başlanypdyr.


Aňtaw gullugynyň maglumatyna görä, TikTok rumyn häkimiýetlerine saýlaw meselesinde jemgyýetçilik pikirini dolandyrmak çärelerine gatnaşyp biljek hasaplar ulgamyny, şeýle-de “Sputnik”, Russiýanyň döwlet habar serişdesi bilen baglanyşykly, rumyn we moldowan ulanyjylaryny nyşana alýan hasaplar ulgamyny kesgitländigini aýtdy.


Dalaşgär resmi jarnamasynda çykdajy harajatlarynyň “nol” bolandygyny aýtdy, ýöne rumyn raýaty Bogdan Pesire degişli TikTok hasaplarynyň biriniň kampaniýa million ýewrodan gowrak maliýe serişdesini harçlandygy mälim boldy diýip, habarda aýdylýar.


TikTok 24-nji oktýabrdan 24-nji noýabra çenli aralykda Jorjeskuny wagyz etmäge kömekleşen ulanyjylaryň tňöleg hökmünde  381,000 dollar geçirendigini tassyklady.