სირიაში ისლამისტურმა ანტისამთავრობო დაჯგუფებებმა პროთურქული „ჰაიათ ტაჰრირ ალ-შამის“ მეთაურობით, რომელიც მსოფლიოს ბევრ ქვეყანაში ტერორისტულ ორგანიზაციად არის აღიარებული, კონტროლი დააწესეს ჩრდილო-დასავლეთ სირიაში მდებარე იდლიბის პროვინციაზე. ამის შესახებ Reuters-ი იტყობინება წყაროზე დაყრდნობით.
ჯიჰადისტებმა დაიკავეს ალეპოს პროვინციის დიდი ნაწილიც. სირიის არმიის ჯარისკაცებს, რომლებსაც პრეზიდენტი ბაშარ ალ-ასადი აკონტროლებს, დისლოკაციის შეცვლა მოუწიათ.
ამავე დროს სირიის ტელევიზია იუწყება, რომ მხოლოდ დღეს მომხდარი შეტაკებების დროს სირიის 150-ზე მეტი ჯარისკაცი დაიღუპა. აღნიშნავენ, რომ დაჯგუფებებმა ქალაქ ალეპოში ადგილობრივი დროით 17:00 საათიდან კომენდანტის საათი დააწესეს 1 დეკემბრამდე.
კატარის ტელეარხი Al-Jazeera აღნიშნავს, რომ ალეპოს აეროპორტი ჯიჰადისტების კონტროლქვეშ მოექცა. მანამდე იტყობინებოდნენ, რომ აეროპორტი სამთავრობო არმიამ დაკეტა. ყველა ფრენა გაუქმებულია.
სირიის მედიის ცნობით, ანტისამთავრობო ძალებმა კუვეირასის აეროდრომის აღებაც მოახერხეს. ის ალეპოს აღმოსავლეთით მდებარეობს და სირიის სამხედრო-საჰაერო ძალებს ეკუთვნის.
ამასობაში CNN Turk-ი თავის წყაროებზე დაყრდნობით იუწყება, რომ „სირიის ეროვნულმა არმიამ“, რომელსაც თურქეთი უჭერს მხარს და რომელიც მტრულად არის განწყობილი ასადის რეჟიმის მიმართ, ქურთების ძალების წინააღმდეგ სამხედრო ოპერაცია დაიწყო ჩრდილო-დასავლეთ სირიაში, ქალაქ თელ-რიფატის რაიონში. ანკარა ქურთულ ორგანიზაციებს ტერორისტულად მიიჩნევს და მიაჩნია, რომ ისინი თელ-რიფატს ბაზად იყენებენ თურქეთის არმიის მიერ კონტროლირებად სირიის ჩრდილოეთ რეგიონებზე თავდასხმებისთვის.
თურქეთის საგარეო საქმეთა მინისტრმა ჰაკან ფიდანმა განაცხადა, რომ ანკარა არ უჭერს მხარს ალეპოში არმიასა და ანტისამთავრობო ჯგუფებს შორის ბრძოლას, იუწყება En Son Haber-ი. ფიდანის თქმით, რეგიონში ტერორისტულ დაჯგუფებებსმხარს უჭერს შეერთებული შტატები, რომლის გარეშეც „ისინი სამ დღესაც ვერ გაძლებდნენ“. მან ასევე აღნიშნა, რომ თურქეთი სიფრთხილის ზომებს მიმართავს კონფლიქტის ესკალაციასთან დაკავშირებით.
შეერთებული შტატები ირწმუნება, რომ არ მონაწილეობდა ასადის არმიის პოზიციებზე სირიის დაჯგუფებების თავდასხმებში. გამოცემა Axios აღნიშნავს, რომ ჯიჰადისტების შეტევა მოულოდნელი იყო თეთრი სახლისთვის.
ბაშარ ალ-ასადის რეჟიმს მხარს უჭერენ ირანი, რუსეთი და ლიბანური რადიკალური დაჯგუფება ჰეზბოლა, რომელიც აშშ-ში ტერორისტულ ორგანიზაციად არის აღიარებული.
შაბათს რუსეთის საგარეო საქმეთა მინისტრმა სერგეი ლავროვმა სატელეფონო საუბარი გამართა თურქეთისა და ირანის საგარეო საქმეთა მინისტრებთან. მხარეებმა გამოთქვეს შეშფოთება სირიაში ვითარების განვითარებით და დაადასტურეს ძალისხმევის კოორდინაციის აუცილებლობა იქ სიტუაციის სტაბილიზაციისთვის.
ასადის მოწინააღმდეგე ძალების ფართომასშტაბიანი წინსვლა ჩრდილო-დასავლეთ სირიაში, ალეპოსა და იდლიბის პროვინციებში დაიწყო 27 ნოემბერს, იმავე დღეს, როდესაც მეზობელ ლიბანში ძალაში შევიდა პროირანულ ჰეზბოლასა და ისრაელს შორის ცეცხლის შეწყვეტის შეთანხმება.
გავრცელებული ინფორმაციით, მოსკოვი დამასკს დამატებით სამხედრო დახმარებას დაჰპირდა ამბოხებულებისთვის ხელის შესაშლელად.
რუსეთს, ბაშარ ალ-ასადის ერთ-ერთ მთავარ მოკავშირეს, აქვს საჰაერო ბაზა ჰმეიმიმის აეროდრომზე და საზღვაო ბაზა სირიის ტარტუსის პორტში. ხმელთაშუა ზღვაში მუდმივ რეჟიმში მოქმედებს რუსული ესკადრა.
რუსეთის ჯარები სირიაში საომარ მოქმედებებში ჩაერთნენ 2015 წლიდან, როდესაც რუსეთის საჰაერო კოსმოსური ძალების თვითმფრინავებმა სამოქალაქო ომის დროს ასადის მოწინააღმდეგეების პოზიციების დაბომბვა დაიწყეს. დარტყმები ხორციელდებოდა როგორც ტერორისტებად აღიარებულ ჯგუფებზე, ასევე ასადის ზომიერ მოწინააღმდეგეებზე. გავრცელებული ინფორმაციით, ალეპოს დაბომბვას მრავალი მშვიდობიანი მოქალაქე შეეწირა.
სირიის სამთავრობო ძალებმა რუსეთისა და ირანის მხარდაჭერით მოახერხეს ქვეყნის უმეტეს ნაწილზე კონტროლის დაწესება. რუსეთისა და თურქეთის მონაწილეობით დადებული ზავი 2020 წლიდან მოქმედებს.
