დემონსტრაციის მეორე დღის გაშუქებისას კვლავ ძალადობენ ჟურნალისტებზე

ცნობები დროგამოშვებით ახლდება - ამჟამად, სულ მცირე, ხუთ ჟურნალისტს გაუსწორდნენ ფიზიკურად.


29-30 ნოემბერს, გვიან ღამით, რუსთაველის გამზირზე პრო-ევროპულ საპროტესტო დემონსტრაციაზე ჟურნალისტური საქმიანობის შესრულებისას, წინა ღამის მსგავსად, ჟურნალისტები დაშავდნენ.


პოლიციის თანამშრომლები ჟურნალისტებზე ფიზიკურად ძალადობენ და სამსახურეობრივი მოვალეობის შესრულებაში ხელს უშლიან.



„პუბლიკის“ ცნობით, გამოცემის ჟურნალისტს, ანა მსხალაძეს პროფესიული მოვალეობის შესრულების დროს სპეცრაზმელმა ხელი დაარტყა და ტელეფონი წაართვა ჭიჭინაძის ქუჩის მიმდებარედ, როდესაც იგი სპეცრაზმის მიერ მოქალაქეების ძალადობრივად დაკავებას იღებდა. „მას შემდეგ, რაც ჟურნალისტმა სპეცრაზმელს უთხრა, რომ ის იყო ჟურნალისტი და ტელეფონის ასაღებად დაიხარა, მას თავში ჩაარტყეს, შემდეგ კი, სავარაუდოდ, მისი ტელეფონი აიღეს და გაიქცნენ“, - იუწყება „პუბლიკა“.
ფიზიკურად გაუსწორდნენ ჟურნალისტს, „რეალპოლიტიკის“ რედაქტორ აკა ზარქუას, რომელიც პირდაპირ ეთერში ერთვებოდა პარლამენტის მიმდებარედ, შევჩენკოსა დ ზუბალაშვილების ქუჩების კვეთიდან. „რაღაც ეტაპზე მეთაური მოვიდა, რომელიც ცდილობდა ბეჯი პირში ჩაეტენა“, - წერს იგი.





„ტელეკომპანია პირველის“ ჟურნალისტმა მარიამ გაფრინდაშვილმა საპროტესტო აქციის გაშუქებისას, პარლამენტის გვერდით, თავის არეში მიიღო დაზიანებები; იგი მძიმე დაზიანებით ინგოროყვას კლინიკაში გადაიყვანეს;





„პირველის“ ცნობითვე, დაშავდა ამავე ტელეკომპანიის ოპერატორნი პაპუნა ხაჩიძე;
თბილისში ბაზირებული რუსული ლიბერალური გამოცემის, Paper Kartuli-ის ჟურნალისტი და ფოტორეპორტიორი, ფიოდორ ხუდოკორმოვი ამბობს, რომ პოლიციელებმა სცემეს. მას თვალის არეში აქვს დაზიანება. მისი თქმით, პოლიციელები ფიზიკურად ჭიჭინაძის ქუჩაზე გაუსწორდნენ. ვიდეოში, რომელსაც გამოცემა აქვეყნებს, ისმის, როგორ აგინებს ერთ-ერთი პოლიციელი ჟურნალისტს.




საპროტესტო დემონსტრაცია გრძელდება.


დემონსტრანტები რუსთაველის გამზირზე ცდილობენ დარჩენას - პოლიცია მათ დარბევას აგრძელებს.


შსს-მ კვლავ გამოიყენა წყლის ჭავლი და სპეციალური საშუალებები.




მეორე დღეა საქართველოს პარლამენტთან ევროინტეგრაციის მხარდამჭერი ხალხმრავალი აქცია იმართება.


ათასობით დემონსტრანტი რუსთაველის გამზირზე პარლამენტის წინ მეორე დღეა აპროტესტებს მთავრობის გადაწყვეტილებას, შეაჩეროს საქართველოს ევროინტეგრაციის პროცესი „2028 წლამდე“.


29 ნოემბერს, ღამის ორი საათიდან, საქართველოს პარლამენტთან პოლიციასა და დემონსტრანტებს შორის პერიოდული დაპირისპირებების შემდეგ, შინაგან საქმეთა სამინისტრომ აქცია დაარბია და მონაწილეები დააკავა.


შსს-ს თანახმად, „აქცია გასცდა შეკრებისა და მანიფესტაციის კანონით დადგენილ ნორმებს“ და მონაწილეები სამართალდამცავებს ფიზიკურად დაუპირისპირდნენ.


28-29 ნოემბრის ღამეს პოლიციამ 43 ადამიანი დააკავა, დაშავდა არაერთი. სამართალდამცავებმა იძალადეს და საქმიანობაში ხელი შეუშალეს 20-ზე მეტ ჟურნალისტს.