დოლარის კურსმა 2022 წლის შემდეგ პირველად გადააჭარბა 114 რუბლს
ოთხშაბათს Forex-ის საერთაშორისო ბაზარზე დოლარის კურსმა 114 რუბლს გადააჭარბა. ბოლოს მან ამ დონეს მიაღწია 2022 წლის მარტის შუა რიცხვებში. რუბლის ვარდნას ხელს უწყობს, კერძოდ, რუსეთის ეკონომიკის წინააღმდეგ აშშ-ის სანქციების ახალი პაკეტი, მათ შორის, სანქციები, რომლებიც დაწესდა „გაზპრომბანკის“, ქვეყანაში უცხოური ვალუტის ერთ-ერთი უმსხვილესი შემომტანის წინააღმდეგ, წერდა 26 ნოემბერს RBC.
გუშინ ცენტრალურმა ბანკმა დღეის კურსად დაადგინა 105 რუბლი დოლარისთვის და 110,49 რუბლი ევროსთვის. ოთხშაბათს რუსულმა ვალუტამ მსოფლიო ვალუტებთან მიმართებაში კიდევ რამდენიმე პროცენტი დაკარგა. ევროს კურსმა 120 რუბლს გადააჭარბა.
ნოემბერში ფინანსთა მინისტრმა ანტონ სილუანოვმა განაცხადა, რომ სუსტი რუბლი ხელს შეუწყობს ექსპორტს. გამოცემა The Bell-ის თანახმად, სამინისტრომ იწინასწარმეტყველა, რომ 2027 წლისთვის დოლარის საშუალო კურსი 103 რუბლი იქნება. ეს პროგნოზი გაწერილია სახელმწიფო სათათბიროსა და ფედერაციის საბჭოს მიერ მიღებულ ფედერალური ბიუჯეტის პროექტში.
თუმცა, რუბლი უწყების პროგნოზებზე უფრო სწრაფად უფასურდება. RBC-ს მიერ გამოკითხული ექსპერტები შესაძლო მიზეზებს შორის მიუთითებენ უცხოური ვალუტის შემოდინების შემცირებაზე, იაფ ნავთობსა და „სპეკულაციურ კომპონენტზე“, ანუ საფონდო ბირჟაზე რუბლის შესუსტების მიზნით თამაშზე. Bloomberg-ის ცნობით, ხელისუფლება მოელის, რომ გაუფასურებული ვალუტა შეამცირებს ომის დროის ბიუჯეტის დეფიციტს.