له افغانستان د ترهګرۍ د ګواښ اندېښنې؛ قزاقستان کې د ډلهييز امنيتي سازمان غونډه کېږي
د دې سازمان عمومي منشي ایمانقلي تاسماګامبیتوف پرون وویل چې، د ډلهییز امنیتي تړون د سازمان غړیو هېوادو ته لاهم د افغانستان له خاورې ګواښونه موجود دي.
د ډلهییز امنیتي تړون سازمان په ۲۰۰۲میلادي کال کې جوړ شو چې روسیه، ارمنستان، بیلاروس، قزاقستان، قرغزستان او تاجکستان یې غړي دي.
د دې هېوادو سرمشریزه یوه ورځ وروسته تر دې جوړیږي چې، مسکو یو ځل بیا په کابل کې له افغان طالبانو سره د اړیکو پر پراختیا ټینګار کړی دی.
د روسیې د بهرنیو چارو د وزارت ویاندې د چهارشنبې په ورځ وویل، مسکو ته له کابل سره د اړیکو پراختیا مهمه ده، خو تر هغو چې د طالبانو تحریک د ترهګرو سازمانونو له لېست څخه نهوي ایستل شوی، دا کار ممکنه نهدی.
د روسیې تاس اژانس د اغلې زاخارووا خبرې رااخیستې دي چې وایي، روسیه د نړۍ د نورو قدرتونو پهڅېر له کابل سره د دوه اړخیزو ګټو په برخه کې د عملي همکاریو د پراختیا اراده لري.
ماریا زاخارووا ټینګار وکړ چې، له افغانستان څخه د ترورستي تهدید او مخدرو موادو د قاچاق د ګواښ مخنیوی هغه وخت ممکن دی، چې د ترهګرۍ لګېدلی تور له طالبانو لرې شي.
د اغلې زاخارووا تر دې څرګندونو مخکې د روسیې استازیو جرګې دولسو غړیو د یوې داسې لایحې مسوده وړاندې کړه چې، د دغه هېواد د ترهګرو سازمانونو له نوملړه پهکې په موقته توګه د طالبانو د نومونو د ایستلو وړاندیز شوی دی.
په مسکو کې د افغانستان پخوانی ډیپلومات غوث جانباز پهدې باور دی چې روسیه له زړه له طالبانو سره اړيکي نه ساتي.
نوموړی وايي: "روسیه اوسمهال له حاکم نظام سره لوبه کوي او په دغه لوبه کې یې ساتي. دا لوبه له څو بعدونو څخه تشکل شوې ده. له یوه لوري عمومي سیاسي تعامل دی، اما پهکې محتوایي چلند نهشته، په رسمیت پېژندل نهشته، د یوه دولت په صفت پروتوکل ورکول نهشته. فقط دا هڅه کوي چې افغانستان او په اصطلاح اوسنی حاکم نظام په همهغه عمومي مدیریت کې له منطقې او له خپلو متحدینو سره یوځای وساتي. لهدې ها خوا کومې ستراتېژيکي اړیکي له اوسني حاکمیت سره نه پالي."
د منځنۍ اسیا هېوادونو له افغانستانه د دوی خاورو ته د ترهګرو د اوښتو په برخه کې بیا بیا اندېښنه څرګنده کړې ده او روسیه تر ډېره له افغانستانه د مخدرو موادو قاچاق ته اندېښمنه ده.