ფსბ-მ გამოაცხადა მოსკოვში ბრიტანეთის საელჩოს პოლიტიკური განყოფილების მეორე მდივნის, უილკს ედვარდ პრაიორისთვის აკრედიტაციის ჩამორთმევისა და ქვეყნიდან გაძევების შესახებ. სპეცსამსახური ამტკიცებს, რომ პრაიორმა საკუთარ თავზე ცრუ ინფორმაცია მიუთითა რუსეთში შესვლის ნებართვის მიღებისას.
პრაიორი, როგორც ფსბ-ს ანგარიშიდან ჩანს, ეჭვმიტანილია სადაზვერვო და დივერსიულ საქმიანობაში, რაც მუქარას წარმოადგენს ეროვნული უსაფრთხოებისთვის. უწყება ასევე მიუთითებს, რომ პრაიორმა „ამ შენიღბულ თანამდებობაზე შეცვალა ამა წლის აგვისტოში რუსეთიდან გაძევებული ექვსი ბრიტანელი დაზვერვის ოფიცრიდან ერთ-ერთი“. დიპლომატი ვალდებულია ორ კვირაში დატოვოს ქვეყანა.
პრაქტიკულად ერთდროულად გაჩნდა ინფორმაცია იმის შესახებ, რომ რუსეთის საგარეო საქმეთა სამინისტროში დაიბარეს ბრიტანეთის ელჩი მოსკოვში, ნაიჯელ კეისი. ამის შესახებ ტასი იტყობინება საგარეო საქმეთა სამინისტროს წარმომადგენელ მარია ზახაროვაზე დაყრდნობით.
ბრიტანეთის ხელისუფლების რეაქცია პრაიორის გაძევებაზე და ბრალდებებზე ჯერ არ გავრცელებულა. გადაწყვეტილება გამოცხადდა მოსკოვსა და დასავლეთს შორის დაძაბულობის მორიგი რაუნდის ფონზე, რაც დაკავშირებულია პუბლიკაციებთან იმის შესახებ, რომ უკრაინამ თავისი მოკავშირეებისგან, კერძოდ შეერთებული შტატებისა და დიდი ბრიტანეთისგან, ნებართვა მიიღო, მათი რაკეტები გამოიყენოს რუსეთის ტერიტორიაზე მდებარე სამიზნეებზე დარტყმებისთვის.
2024 წლის სექტემბერში ფსბ იტყობინებოდა ბრიტანეთის საელჩოს ექვსი თანამშრომლისთვის აკრედიტაციის ჩამორთმევის შესახებ. ოფიციალური ინფორმაციით, მათს „ ქმედებებში სადაზვერვო-დივერსიული საქმიანობის ნიშნები იქნა აღმოჩენილი“. ბრიტანეთის საგარეო საქმეთა სამინისტრომ მაშინ განაცხადა, რომ ეს მოხდა მას შემდეგ, რაც ლონდონმა გადადგა ნაბიჯები ევროპასა და დიდ ბრიტანეთში „რუსეთის სახელმწიფოს მიერ მართული ქმედებების“ წინააღმდეგ. ლონდონის განცხადებაში უსაფუძვლოს უწოდებენ დიპლომატების მიმართ რუსეთის ხელისუფლების ბრალდებებს.
