د افغانستان د ادبي او فرهنګي ټولنې یو شمېر غړو د طالبانو لهخوا د ځینو کتابونو پر وړاندې د بندیز په غبرګون کې په ټولنیزو رسنیو کې د کتاب لوستنې د دودولو یو کمپاین پیل کړی دی.
لیکواله او د بشري حقونو فعاله حمیرا قادري د طالبانو لهخوا پر ځینو کتابونو د بنديز په غبرګون کې په ټولنيزو رسنيو کې د کتاب سېځونکو پر ضد هشټګ کمپاين پیل کړی دی.
هغه وايي: "دوی د دې په اړه اندېښمن نه دي چې موږ به وتښتو، ځکه موږ ډېر لرې نه شو تللی، هغوی د دې په اړه اندېښمن دي چې زموږ خیال به لوړ شي، د هغو لارو په اړه اندېښمن دي چې د انسان په دننه کې پرانیستل کېږي او انسان ته لوړتیا ورکوي. د سرګذشت نديمه له کتاب څخه."
د دې کمپاین تر پیل وروسته، د دوشنبې له ورځې راهيسې د نومبر ۲۵مه، د ادبي او فرهنګي ټولنې ګڼ شمېر غړو او نور افغانان له دې هشټګ سره يوځاى شوي او د خپلو کتاب لوستلو ویډیوګانې یې خپرې کړي دي.
دا په داسې حال کې ده چې د طالبانو د حکومت د اطلاعاتو او کلتور وزارت په دې وروستیو کې د ۴۰۰ عنوانه کتابونو د ټولولو لړۍ پیل کړې چې د دوی په خبره، د ملي ګټو او اسلامي ارزښتونو سره په ټکر کې دي.
د بشري حقونو فعاله رویا ماندګار، چې دې کمپاين سره یوځای شوې، د سه شنبې په ورځ يې له ازادي راډيو سره په خبرو کې وویل: "زما په نظر هغه هشټګ چې دوستانو رامنځته کړی، د ملاتړ وړ دی، دا تر ټولو کوچنی کار دی چې موږ یې کولی شو."
همدارنګه افغان شاعر او لیکوال شمیم فروتن وایي چې د کتابونو راټولول د غیراسلامي محتوا لرلو په پلمه ښکاره ځپنه او په ټولنه د بندیزونو لګولو هڅه ده.
نوموړي له ازادي راډيو سره په خبرو کې ادعا وکړه چې طالبان آن هغه کتابونه هم ټولوي چې لیکوالانې يې ښځې دي.
هغه وايي: "د طالبانو وروستۍ پرېکړې د کتابونو سوځولو او د ښځینه لیکوالانو د کتابونو د راټولولو په اړه په حقیقت کې ځپونکی محدودیت دی، دوی هره ورځ هڅه کوي خلک لا ډېر محدود کړي او دا ښکاره د بشر حقونو او د بیان د آزادۍ څخه سرغړونه ده."
بلې لیکوالې او د دې کمپاین غړې مرسل سایس له ازادي راډيو سره په خبرو کې وویل: "دا یو ښه کمپاین دی چې ټولنه ویښه کړي او خلکو ته د کتاب لوستنې اهمیت وروښیي، د دی کمپاپن په پيل سره موږ بیا د کتابونو، موسیقي او نورو فرهنګي ارزښتونو په اړه خبرې وکړو او د خلکو پام به دې مهمې موضوع ته رااړوو."
د طالبانو د حکومت د اطلاعاتو او کلتور وزارت په دې وروستیو کې په یو شمېر ولایتونو کې د ځینو کتابونو د ټولولو بهیر پیل کړی چې د دوی په وینا دا کتابونه د اسلامي ایډیالوژۍ او افغاني کلتور سره په ټکر کې دي.
خو یو شمېر هغه لیکوال چې کتابونه یې د یادو لاملونو له امله ټول شوي، ادعا کوي چې د دوی کتابونه له دیني او فرهنګي ارزښتونو سره هېڅ ټکر نه لري او په خبره یې د طالبانو حکومت دوی سره د نظر د اختلاف له امله دا اقدام کړی دی.
