Birleşen Arap Emirlikleri 25-nji noýabrda 28 ýaşly ysraýyl-moldowan prawoslaw ruhanysynyň öldürilmeginde güman edilip saklanan üç adamyň özbek raýatlary bolandygyny mälim etdi.
Güman edilýänler bir gün öň, howpsuzlyk gulluklary Dubaýdaky Koşer dükanyna ýolbaşçylyk edýän we prawoslaw ýewreýleriň "Çabad" toparynyň wekili Zwi Koganyň jesedini tapanlaryndan soň tussag edildi.
BAE häkimiýetleri güman edilýänleri 28 ýaşyndaky Mahmudjon Abdurahim, 28 ýaşyndaky Olimboý Tohirowiç we 33 ýaşly Azizbek Kamilowiç diýip tanatdy.
Görnüşinden, soňky iki erkek familiýalarynyň ýerine kakalarynyň atlaryny görkezýär. Güman edilýänlere garşy resmi aýyplama bildirilip-bildirilmändigi aýdylmady.
"Biziň dünýämizde ýigrenje orun ýok. Biziň pikirlerimiz onuň maşgalasy, ýewreý jemagaty we gynanýanlaryň ählisi bilen. Biz Ysraýyl we BAE bilen aragatnaşyk saklaýarys" diýip, Moldowanyň prezidenti Maýa Sandu aýtdy.
Koganyň dereksiz ýitendigi 22-nji noýabrda habar berildi. Soň onuň jesedi Al Aýn şäherinde tapyldy. Ysraýylyň premýer-ministri Benýamin Netanýahuyň edarasy Koganyň öldürilmegini ýazgardy we muny "anti-semit terrorçylyk hereketi" diýip atlandyrdy.
