იმ ოპოზიციური პარტიების წარმომადგენლები, ვინც 26 ოქტომბრის არჩევნებზე ბარიერი გადალახეს, მე-11 მოწვევის პარლამენტის პირველად შეკრების დღის ბოლოს კიდევ ერთხელ აკეთებენ განცხადებას იმის შესახებ, რომ ამ პარლამენტში შესვლას არ აპირებენ და საკუთარი მანდატების გაუქმებას ითხოვენ - ოპოზიცია ჩატარებულ არჩევნებს გაყალბებულად მიიჩნევს და ამ პარლამენტს არალეგიტიმურად თვლის.
"დაუყოვნებლივ მოვითხოვ შეწყდეს ჩემი მანდატი" - თქვა გიორგი ვაშაძემ პარლამენტის წინ აღმართული საპორტესტო ტრიბუნიდან 25 ნოემბრის დღის მეორე ნახევარში. ის ამბობს რომ პარლამენტს უკვე გაუგზავნა ელექტრონული ფოსტით მოთხვნა დეპუტატის სტატუსის მოხსნის შესახებ.
"დღევანდელ დღეს, ქართულმა ოცნებამ, ივანიშვილმა, საკუთარი თავი დააყენა კონსტიტუციის გარეთ და აქედან გამომდინარე, ჩვენ გადავდივართ ახალ ეტაპზე, როცა ამ ქვეყანას ხელისუფლება არ ჰყავს, ჰყავს მხოლოდ თვითმარქვია დაჯგუფება, რომელიც თავს უწოდებს ხელისუფლებას და ჩვენ ყველანი ერთად შევქმნით ალტერნატიულ მექანიზმებს რომელიც იქნება ლეგიტიმური თქვენგან და დაიწყებს ურთიერთობებს საერთაშორისო თანამეგობრობასთან იმისთვის, რომ საბოლოოდ ჩაბეტონდეს, რომ არ მოხდება ამ არჩევნებს აღიარება და თქვენს წარმომადგენლად იქნება ცნობილი ის მექანიზმი, რომელსაც ჩამოვაყალიბებთ ოპოზიციურ კოლეგებთან ერთად" - თქვა გიორგი ვაშაძემ.
სიების ჩახსნაზე და მანდატების დატოვებაზე ისაუბრეს პარლამენტის წინ ელენე ხოშტარიამ და ზურა ჯაფარიძემაც. ისინი პარტია "დროას" და პარტია "გირჩი - მეტი თავისუფლებას" წარმოადგენენ. ორივე პარტია 26 ოქტომბრის არჩევნებზე შედიოდა კოალიციაში ცვლილებებისთვის.
"ამ კონკრეტულ მომენტი მინდა განვაცხადო ფორმალურად, კოალიცია ცვლილებისთვის სახელით, რომ ამ წუთებში ჩვენი წარმომადგენელი იმყოფება ცესკოში და საარჩევნო კოდექსის 120-ე მუხლის მეორე პუნქტის შესაბამისად, მიმართავს ცესკოს, რომ ჩვენ ვხსნით ჩვენ სიას, არ ვაღიარებთ არჩევნებს, არ ვაპირებთ ამ პარლამენტთან არანაირ კავშირს და ფეხს არავინ ჩვენგან არ შედგამს ამ პარლამენტში" - თქვა ელენე ხოშტარიამ.
ამ კოალიციის კიდევ ერთმა ლიდერმა, ნიკა გვარამიამ ფეისბუკზე გამოაქვეყნა დოკუმენტის ტექსტი, რომელსაც ის და ნიკა მელია აწერს ხელს - ორივე პოლიტიკოსი პარტია "ახალს" წარმოადგენენ.
"შექმნილ ვითარებაში, აუცილებლად მივიჩნევთ, ვიმოქმედოთ მხოლოდ ქართველი ხალხისა და ქართული სახელმწიფოს ინტერესებში. ქვეყანაში პარლამენტად თვითგამოცხადებული ხელისუფლების მიმთვისებელთა ჯგუფთან რაიმე სამართლებრივ ფორმატში თანამშრომლობას სრულიად გამოვრიცხავთ. აღნიშნულს მივიჩნევთ არალეგალურ და არალეგიტიმურ პროცესებში თანამონაწილეობად.
აქედან გამომდინარე მოგმართავთ, საქართველოს ორგანული კანონის „საქართველოს საარჩევნო კოდექსის“ 120-ე მუხლის მე-2 პუნქტის შესაბამისად პარტიული სიიდან მოხსნათ ის დარჩენილი პარლამენტის წევრობის კანდიდატები, რომელთა უფლებამოსილებაც არ იცნო საქართველოს პარლამენტის 2024 წლის 26 ოქტომბრის არჩევნების შედეგების შემაჯამებელი ოქმით" - ესაა ფრაგმენტი იმ დოკუმენტიდან, რომლის ტექსტსაც ნიკა გვარამია ავრცელებს.
პარლამენტში 25 ნოემბრის სხდომაზე არ ყოფილან პარტია "საქართველოსთვის" წევრები - ყოფილი პრემიერ-მინისტრის, გიორგი გახარია და მისი პარტიების წევრები იმ საპროტესტო აქციაში მონაწილეობდნენ, რომელიც პარლამენტთან იმართებოდა. მათი ამ დრომდე ცნობილი პოზიციით, პარლამენტში შესვლას არც ამ პარტიის წევრები აპირებენ.
რადიო თავისუფლება პარლამენტის პრესსამსახურთან ცდილობდა იმის გარკვევას, რამდენი განაცხადი აქვს საკანონმდებლო ორგანოს მიღებული ოპოზიციონერი პარლამენტარების უფლებამოსილების შეწყვეტის შესახებ - პრესსამსახურმა ჩვენი კითხვა მასალის გამოქვეყნების მომენტისთვის უპასუხოდ დატოვა. პასუხის მიღების შემთხვევაში მასალა განახლდება.
მე-11 მოწვევის პარლამენტი პირველ სხდომაზე შეიკრიბა ამ პარლამენტის ლეგიტიმურობასთან დაკავშირებული კითხვის ნიშნების და ქუჩაში საპროტესტო აქციის ფონზე. ოპოზიციური პარტიები, რომლებმაც 26 ოქტომბრის არჩევნებში ბარიერი გადალახეს, არჩევნებს გაყალბებულად, პარლამენტს კი არალეგიტიმურად მიიჩნევენ. საქართველოს პრეზიდენტმა საკონსტიტუციო სასამართლოში შეიტანა სარჩელი ამ პარლამენტის ლეგიტიმურობაზე სამსჯელოდ - სალომე ზურაბიშვილი ასაჩივრებს არჩევნებზე ორი კონსტიტუციური უფლების, ხმის ფარულობისა და არჩევნების საყოველთაობის დარღვევას. 26 ოქტომბრის არჩევნების არაკონსტიტუციურად ცნობისთვის საკონსტიტუციო სასამართლოს მიმართა 30-მა დეპუტატმაც.
საქართველოს პარლამენტის რეგლამენტის 86-ე მუხლის მიხედვით, დეპუტატის მანდატი არ გადაეცემა იმ პოლიტიკოსს, რომლის არჩევის საკითხიც საკონსტიტუციო სასამართლოშია გასაჩივრებული.
მე-11 მოწვევის პარლამენტის პირველ სხდომას არ ესწრებიან დიპლომატიური კორპუსის წარმომადგენლები, რომლებიც არ მიიწვიეს. შეზღუდულია მედიის დაშვებაც.
