نن د جنسیت پر بنسټ د تاوتریخوالي پر وړاندې نړیوال ۱۶ ورځنی کمپاین پیليږي
دوی دغه کمپاین په افغانستان کې د افغان مېرمنو او نجونو پر وړاندې د طالبانو له لوري د مخ پر زیاتېدونکو محدودیتونو او لهدې کبله د دوی پر وړاندې د پرتو ستونزو او ننګونو د بیان لپاره ښه فرصت بولي.
د ښځو د حقونو فعاله ژولیا پارسي چې د خپلو فعالیتونو له کبله د طالبانو لوري زنداني شوې هم وه، پهدې اړه ازادي راډیو ته وویل: "زه له دغه کمپاین څخه ملاتړ کوم او د افغان مېرمنو د حقونو د خوندیتوب لپاره د دوی په څنګ کې درېږم، که موږ چېرته په افغانستان کې برنامې نهشو جوړولای فکر کوم ښه ده چې د سوشل میډیا له لارې پهدې اړه عامه پوهاوی وشي، زه له ټولو خلکو غواړم چې په دغه کمپاین کې زموږ سره ودریږي او ملاتړ مو وکړي."
ملګري ملتونه وايي، د ښځو پر وړاندې د تاوتریخوالي د لهمنځه وړلو په موخه په یوه کمپاین کې چې هر کال د نومبر له ۲۵مې څخه د ډسمبر تر ۱۰مې پورې د "NoExcuses" یا "هیڅ بهانه نهشته" له شعار سره پیلیږي، له حکومتونو غواړي چې د ښځو او نجونو پر وړاندې د تاوتریخوالي د مخنیوي په برخه کې پانګونه وکړي او د جنسیت پر بنسټ د تاوتریخوالي د مخنیوي لپاره د دې پانګونې لارې چارې شریکې کړي.
د ملګروملتونو عمومي اسمبلۍ د ۱۹۹۹ کال د اکتوبر په ۱۷مه نېټه د نومبر ۲۵ د ښځو پر وړاندې د تاوتریخوالي د لهمنځه وړلو د نړیوالې ورځې په توګه تصویب کړه.
په ورته وخت کې د افغان ښځو د سیاسي مشارکت شبکې مشره ترنم سعیدي وايي، سږ کال افغان مېرمنې د نومبر ۲۵ پهداسې حال کې لمانځي چې مېرمنې او نجونې په افغانستان کې له زیاتېدونکي تاوتریخوالي، ټولنیز ذلت او سیستماتیکې بېعدالتیو سره مخامخ دي.
اغلې سعیدي رسنیو ته په استول شوي پیغام کې ویلي، د جنسیت پر بنسټ د تاوتریخوالي پر وړاندې نړیوال ۱۶ ورځنی کمپاین به د هېواد د ښځو د غږ په پیاوړي کولو کې مرسته وکړي او نړیوالو ته به دا پیغام ورسوي چې په افغانستان کې د ښځو او نجونو وضعیت سمدستي پاملرنې او اقدام ته اړتیا لري.
د جنسیت پر بنسټ د تاوتریخوالي پر وړاندې نړیوال ۱۶ ورځنی کمپاین پهداسې حال کې پيلیږي چې د طالبانو حکومت د ۲۰۲۱م کال په اګست میاشت کې له بیا واکمنېدو وروسته افغان مېرمنې له زدهکړو، کار، سیاسي او ټولنیز مشارکته راوګرځولې.
که څه هم په کراتو په کور دننه او بهر له طالبانو د ښځو پر وړاندې د نرم دریځ او د دوی د حقونو د ورکړې غوښتنې مطرح شوي، خو طالبانو تل دا ادعا کړې چې د ټولو افغانانو حقونه د دو په ټکو د اسلامي شریعت په چوکاټ کې خوندي دي.