გმირთა მოედანი გადაიკეტა - ოპოზიციის ლიდერების თქმით, დამატებით გეგმებს დააანონსებენ
ოპოზიციის წევრებმა კარვების აღმართვა დაიწყეს.
ორგანიზატორები არიან პარტიები - „ერთიანობა - ნაციონალური მოძრაობა“ და „კოალიცია ცვლილებისთვის“.
აქცია 15:00 საათზე დაიწყო ივანე ჯავახიშვილის სახელობის თბილისის სახელმწიფო უნივერსიტეტთან.
დაახლოებით ერთ საათში, ოპოზიციის ლიდერების მოწოდების შემდეგ, აქციამ გმირთა მოედანზე გადაინაცვლა.
ნიკა მელია, ნიკა გვარამია და ელენე ხოშტარია აცხადებენ, რომ გმირთა მოედანი გადაიკეტება საღამოს 10 საათამდე.
ისინი მხარდამჭერებს მოუწოდებენ, შეუერთდნენ.
მათივე თქმით, დღის განმავლობაში მომდევნო დღეების სამოქმედო გეგმას გააცნობენ საზოგადოებას.
ისინი ვადამდელ საპარლამენტო არჩევნებს ითხოვენ.
25 ნოემბერს პარლამენტის პირველი სხდომაა დანიშნული. მას ოპოზიცია ბოიკოტს უცხადებს.
ამავე პარტიების - „ერთიანობა - ნაციონალური მოძრაობა“ და „კოალიცია ცვლილებისთვის“ - ორგანიზებით გამართული აქცია პოლიციამ დაშალა. დააკავეს 16 ადამიანი.