გამოკითხული რუსების 53%-ს სამშვიდობო მოლაპარაკებები სურს
საომარი მოქმედებების გაგრძელებას მხარს უჭერს გამოკითხულთა 36%, რაც ყველაზე დაბალი მაჩვენებელია 2022 წლის მარტიდან, დაკვირვების მთელი პერიოდის განმავლობაში. სამშვიდობო მოლაპარაკებების მომხრეთა რაოდენობის ზრდისა და ომის მომხრეთა რაოდენობის შემცირების ტენდენცია 2023 წლის თებერვლიდან შეინიშნება.
სამშვიდობო მოლაპარაკებების ყველაზე დიდ მხარდაჭერას აჩვენებენ ქალები (59%), ახალგაზრდები (68%), დაბალშემოსავლიანი რუსები (59%), ონლაინმედიისა და ტელეგრამის არხების აუდიტორია (თითოეული 51%).
სამშვიდობო შეთანხმების ხელმოწერას "ხვალ" მხარს დაუჭერდა 79%, ხოლო გამოკითხულთა 60% მზადაა ცეცხლის შეწყვეტის შეთანხმებას წინაპირობების გარეშე დათანხმდეს.
მანამდე, 19 ნოემბერს, უკრაინაში ჩატარებული მსგავსი კვლევის შედეგები გამოქვეყნდა კვლევითი კომპანია Gallup-ის მიერ. ამ გამოკითხვის თანახმად, თითქმის განახევრდა იმ უკრაინელების რიცხვი, რომლებიც თვლიან, რომ ქვეყანამ რუსეთთან ომი უნდა აწარმოოს სრულ გამარჯვებამდე. 2024 წელს გამოკითხულთა 52%-ს სურს, რომ კიევმა რაც შეიძლება მალე დაიწყოს სამშვიდობო მოლაპარაკებები, ხოლო 38% ომში საბოლოო გამარჯვების მომხრეა.