პრეზიდენტი: ვინც შევა პარლამენტში, შევა რუსეთში
"დარწმუნებული ვარ, რომ პარტიები არ შევლენ პარლამენტში. უაზროა შედარებები 2020-სთან. [2020 წელს] არ იყო განცდა, რომ ქვეყანა მიდის სხვა მიმართულებით, არ იყო განცდა, რომ მასობრივად გაყალბდა არჩევნები. იყო როგორც ყოველთვის, მე რასაც ვეძახი, ნორმალურ გაყალბებას და ამაზე დამცინიან. მაგრამ ის განცდა რომ მოგვპარეს არჩევნები და ქვეყანა, არ არსებობდა. ძალიან განსხვავებული სიტუაციაა. დღეს ვინც შევა პარლამენტში, შევა რუსეთში", - აღნიშნა პრეზიდენტმა ზურაბიშვილმა და დაამატა, რომ სანამ არცერთი პარტია არ შევა პარლამენტში, "ქართული ოცნება" რჩება მარტო, თუნდაც ოპოზიცია იყოს ბოიკოტის რეჟიმში.
"მარტო არიან. მარტო არიან პარლამენტში, მარტო არიან მთავრობაში. ერთპარტიულია მთავრობა, პარლამენტი, ერთი კაცის ვერტიკალის ქვეშ და ყველა ინსტიტუტი ქვეყანაში, რაც არსებობს სრულიად დამოკიდებულია ამ ერთ პარტიაზე".
ცენტრალურმა საარჩევნო კომისიამ 26 ოქტომბრის არჩევნების შედეგები 16 ნოემბერს შეაჯამა.
შემაჯამებელ ოქმში ასახულ მაჩვენებლებს მხოლოდ “ქართული ოცნება” ეთანხმება. ოპოზიცია, არასამთავრობო სექტორი და პრეზიდენტი 26 ოქტომბრის არჩევნებს გაყალბებულად მიიჩნევენ.
ცესკოს მონაცემების თანახმად, მე-11 მოწვევის პარლამენტში “ქართულ ოცნებას” 150-დან 89 მანდატი ექნება, ხოლო ოთხ ოპოზიციურ პლატფორმას - ჯამში 61 მანდატი:
„კოალიციას ცვლილებისთვის“ – 19 მანდატი;
„ერთიანობა - ნაციონალურ მოძრაობას“ – 16 მანდატი;
„ძლიერ საქართველოს“ – 14 მანდატი;
„გახარია საქართველოსთვის“ – 12 მანდატი.
საერთაშორისო თანამეგობრობა თბილისს არჩევნების სადავო შედეგების ობიექტური გამოძიებისკენ მოუწოდებს, რათა გადამოწმდეს გაყალბებასთან დაკავშირებული “სერიოზული ეჭვები”.