პოლიციაზე თავდასხმაში ბრალდებული მათე დევიძე ამბობს, რომ 19 ნოემბერს, მელიქიშვილის გამზირზე აქციის დაშლისას, არავის დასხმია თავს და ჯოხს მხოლოდ იმიტომ იქნევდა, რომ შეეშინდა და თავის დაცვას ცდილობდა.
ამის შესახებ რადიო თავისუფლებას ეუბნება ადვოკატი ბექა კვინიკაძე. სწორედ მან მოინახულა დიღომში, შინაგან საქმეთა სამინისტროს წინასწარი დაკავების იზოლატორში მყოფი 20 წლის მათე დევიძე, რომელსაც ოფიციალურ ბრალს პროკურატურა 22 ნოემბერს, დილით წარუდგენს. გამოძიება მას პოლიციაზე თავდასხმას ედავება.
შინაგან საქმეთა სამინისტრო 21 ნოემბერს გავრცელებულ განცხადებაში წერს:
„გამოძიებით დადგინდა, რომ მ.დ.-მ მიმდინარე წლის 19 ნოემბერს, თბილისში, მელიქიშვილის გამზირზე გამართულ საპროტესტო აქციაზე, ფიზიკური შეურაცხყოფა მიაყენა ადგილზე საზოგადოებრივი წესრიგის დაცვის მიზნით მობილიზებულ სამართალდამცველებს. კერძოდ, აქციის მიმდინარეობისას, იგი თავს დაესხა პოლიციელებს და ჯოხის დარტყმით სხეულის დაზიანება მიაყენა“.
საქმე სსკ-ის 353-ე პრიმა მუხლის პირველი ნაწილითაა აღძრული.
„მხნედ და მშვიდად დამხვდა. თავს კარგად გრძნობს. ტანსაცმელი, რაც ეცვა, გახადეს და ექსპერტიზაზეა წაღებული. სამართალდამცავებს მიუტანიათ მეორადი ტანსაცმელი და ფეხსაცმელი და ის აცვია“, - ამბობს ბექა კვინიკაძე და განაგრძობს:
„დღეს დილით, როცა სხვა დაკავებულებს ათავისუფლებდნენ იზოლატორიდან, მასაც უთხრეს, რომ უშვებდნენ. აიყვანეს ზედა სართულზე, სადაც დახვდნენ გამომძიებლები. უთხრეს, რამდენიმე კითხვას დაგისვამთ და გაგიშვებთო. აიყვანეს მოტყუებით, არ გააცნეს არანაირი უფლება - მათ შორის, არ უთხრეს, რომ ადვოკატის აყვანის უფლება ჰქონდა და დაიწყეს მისი დაკითხვა.
ძირითადად ეკითხებოდნენ, რატომ იქნევდა ჯოხს. მან უთხრა, რომ ჯოხს იმიტომ ვიქნევდი, შემეშინდა, მაგრამ მიზანი, რომ ვინმესთვის დამერტყა, არ მქონიაო. ამბობს, რომ არავისთვის დაურტყამს და უბრალოდ იქნევდა ჯოხს, იქნევდა დროშის ტარს, არანაირი ხელკეტი არ ჰქონია. გამოკითხვის შემდეგ ისევ იზოლატორში დააბრუნეს და ახლა იქ ელოდება ბრალის წარდგენას.
გამომძიებელს უთქვამს, რომ 22 ნოემბერს, 09:30-ზე წარუდგენენ ბრალს. ხვალვე იმსჯელებს სასამართლო აღკვეთის ღონისძიების საკითხზე. ოჯახისგან ვიცი, რომ ახალი ადვოკატი აიყვანეს და ამ საქმეს მე უკვე ჩამოვშორდი“, - ეუბნება ბექა კვინიკაძე რადიო თავისუფლებას.
სსკ-ის 353-ე პრიმა მუხლის პირველი ნაწილით ჩადენილი დანაშაული ითვალისწინებს თავისუფლების აღკვეთას ვადით 7 წლამდე.
19 ნოემბერს, თბილისის სახელმწიფო უნივერსიტეტის მიმდებარე ტერიტორიის დემონსტრანტებისგან გათავისუფლებისას, სამართალდამცავებმა 16 პირი დააკავეს. მათ შორის იყო მათე დევიძეც. ისევე როგორც სხვა დაკავებულებს, სამართალდამცავები მასაც პოლიციის კანონიერი მოთხოვნისადმი დაუმორჩილებლობას (მუხლი 173) და წვრილმან ხულიგნობას (მუხლი 166) ედავებოდნენ. თუმცა 21 ნოემბერს ადმინისტრაციული სამართალდარღვევით დაწყებული საქმის წარმოება გამოძიებამ სისხლის სამართლის დანაშაულად გადააკვალიფიცირა.
19 ნოემბერს, დილით, საპოლიციო ძალებმა საპროტესტო აქციის მონაწილეებისგან გაათავისუფლეს თბილისის სახელმწიფო უნივერსიტეტის პირველი კორპუსის მიმდებარე ტერიტორია, რომელიც 17 ნოემბრიდან იყო გადაკეტილი.
აქციის მონაწილეებს, რომლებიც 26 ოქტომბრის საპარლამენტო არჩევნებს გაყალბებულად მიიჩნევენ და ხელახალ არჩევნებს მოითხოვენ, ამ ტერიტორიაზე კარვები ჰქონდათ გაშლილი.
საპოლიციო ძალები ჭავჭავაძის გამზირზე 19 ნოემბერს, დაახლოებით დილის შვიდი საათისთვის მივიდნენ. პარალელურად შსს-მ განაცხადა, რომ „შეკრებებისა და მანიფესტაციების შესახებ“ კანონით დაუშვებელია ტრანსპორტის სავალი ნაწილის ხელოვნურად გადაკეტვა, თუ ამას არ მოითხოვს შეკრების მონაწილეთა რაოდენობა.
