უკრაინის ელჩი დიდ ბრიტანეთში, უკრაინის შეიარაღებული ძალების ყოფილი მთავარსარდალი ვალერი ზალუჟნი ამბობს, რომ უკრაინის წინააღმდეგ ომში რუსეთის ავტოკრატიული მოკავშირეების პირდაპირი ჩართვის შემდეგ, მესამე მსოფლიო ომი შეიძლება დაწყებულად ჩაითვალოს.
ამის შესახებ გენერალმა ზალუჟნიმ ყოველწლიური პრემიის "უპ100" ლაურეტთა დაჯილოდების ცერემონიაზე განაცხადა.
"იმიტომ, რომ 2024 წელს უკრაინის წინაშე აღარ დგას მხოლოდ რუსეთი. უკრაინის წინაშე დგანან ჩრდილო კორეელი ჯარისკაცები. მოდით ვიყოთ გულწრფელები. უკვე უკრაინაში ირანული "შაჰიდები" საკმაოდ ღიად, უყოყმანოდ კლავენ მშვიდობიან მოსახლეობას. უკვე სწორედ ჩრდილოეთ კორეის წარმოების რაკეტები მიფრინავენ უკრაინაში, რასაც ღიად აცხადებენ. უკრაინაში ჩინური ნაღმები ფეთქდებიან, რუსულ რაკეტებში კი ჩინურ დეტალებს იყენებენ“, - მოჰყავს გამოცემა „უკრაინსკა პრავდას“ გენერალ ზალუჟნის სიტყვები.
ზალუჟნის 2021 წლიდან ეკავა უკრაინის შეიარაღებული ძალების მთავარსარდლის თანამდებობა. 2024 წლის თებერვლის დასაწყისში მთავარსარდლის პოსტზე ის ჩაანაცვლა ოლექსანდრ სირსკიმ, რომელიც მანამდე უკრაინის სახმელეთო ჯარების სარდალი იყო.
2024 წლის 9 თებერვალს უკრაინის პრეზიდენტმა ვოლოდიმირ ზელენსკიმ უკრაინის შეიარაღებული ძალების ყოფილ მთავარსარდალს, გენერალ ვალერი ზალუჟნის უკრაინის გმირის წოდება მიანიჭა.
გენერალი ზალუჟნი ამჟამად გაერთიანებულ სამეფოში უკრაინის ელჩად მუშაობს.
