არასამთავრობო ორგანიზაცია "ახალგაზრდა იურისტთა ასოციაციამ"(საია), რომელიც 26 ოქტომბრის საპარლამენტო არჩევნებს აკვირდებოდა, 2024 წლის საპარლამენტო არჩევნებზე ხმის ფარულობის დარღვევის საკითხზე სააპელაციო სასამართლოს მიმართა, ცესკოს შემაჯამებელი ოქმისა და არჩევნების შედეგების ბათილად ცნობის მოთხოვნით.
საია ასევე ითხოვს სასამართლოს მიერ დროებითი განჩინების მიღებას, რომლითაც ცესკოს თავმჯდომარეს აეკრძალება არჩევნების შეჯამების შემდგომ კანონმდებლობით გათვალისწინებული ყველა იმ პროცედურის განხორციელება, რომლებიც დაკავშირებულია ახალი საპარლამენტო შემადგენლობის უფლებამოსილების ცნობასთან. მათ შორის, ახალარჩეული პარლამენტის პირველ სხდომაში მონაწილეობა, პარლამენტისთვის არჩევნების შედეგების შეტყობინება და პარლამენტის დროებითი სამანდატო კომისიისთვის პარლამენტის წევრთა უფლებამოსილების ცნობისათვის საჭირო დოკუმენტაციის გადაცემა.
საჩივარში დამატებით მოთხოვნილია საქმეზე სამართალწარმოების შეჩერება პრეზიდენტის საკონსტიტუციო სარჩელზე სასამართლოს გადაწყვეტილების მიღებამდე, რომელიც არჩევნების შედეგების არაკონსტიტუციურად ცნობას შეეხება.
19 ნოემბერს თბილისის საქალაქო სასამართლოს მოსამართლე ბაია ოტიაშვილმა არ დააკმაყოფილა სამი პარტიისა და ერთი არასამთავრობო ორგანიზაციის სარჩელი. ისინი ცენტრალური საარჩევნო კომისიის შემაჯამებელ ოქმს ასაჩივრებდნენ - ითხოვდნენ შემაჯამებელი ოქმის ბათილად ცნობას, არჩევნების შედეგების გაუქმებასა და ხელახალი არჩევნების დანიშვნას.
არჩევნების შედეგების გაბათილების მოთხოვნით ორი სარჩელია შესული საკონსტიტუციო სასამართლოშიც. ერთის ინიციატორია საქართველოს პრეზიდენტი, მეორის კი პარლამენტის 30 წევრი.
საკონსტიტუციო სარჩელის მიზნად მმართველ პარტიაში "ხალხის მოტყუებას" ასახელებენ. როგორც "ქართული ოცნების" აღმასრულებელმა მდივანმა მამუკა მდინარაძემ პარტიის ოფისში 19 ნოემბერს გამართულ ბრიფინგზე განაცხადა, სარჩელის "თვითმიზანიც ეს არის, მიზანიც და რაღაც მანიპულაციები, რომელიც ქუჩაშია გადატანილი".
16 ნოემბერს ცენტრალურმა საარჩევნო კომისიამ შემაჯამებელი ოქმი ხმაურისა და საპროტესტო აქციის ფონზე დაამტკიცა.
26 ოქტომბრის არჩევნების შედეგებს მხოლოდ სახელისუფლებო პარტია აღიარებს.
ცესკოს საბოლოო შედეგებით, მე-11 მოწვევის პარლამენტში “ქართულმა ოცნებამ” 150-დან 89 მანდატი მოიპოვა, ხოლო ოთხ ოპოზიციურ პლატფორმას, ჯამში, 61 მანდატი აქვს. ოპოზიცია აცხადებს, რომ არჩევნები გაყალბდა.
საარჩევნო ადმინისტრაციამ და სასამართლომ არ დააკმაყოფილა არასამთავრობო სექტორის მიერ დაწერილი საჩივრების უდიდესი ნაწილი.
საერთაშორისო თანამეგობრობა თბილისს არჩევნების სადავო შედეგების ობიექტური გამოძიებისკენ მოუწოდებს, რათა გადამოწმდეს გაყალბებასთან დაკავშირებული “სერიოზული ეჭვები”.
