საქართველოს პარლამენტის თავმჯდომარე შალვა პაპუაშვილი ეხმაურება რუსეთის მიერ ოკუპირებულ აფხაზეთში მიმდინარე მოვლენებს - მასობრივ დემონსტრაციებს სოხუმსა და მოსკოვს შორის საინვესტიციო ხელშეკრულების რატიფიცირების წინააღმდეგ და შექმნილ დაძაბულობას.
„ანექსიის მცდელობას მე ვერ დავარქმევდი“, - უთხრა პაპუაშვილმა ჟურნალისტებს 15 ნოემბერს.
„რა თქმა უნდა, ზოგადად, ამდენი ხანია ვსაუბრობთ, რომ ეს რისკები არის, როდესაც ვხედავდით ანექსიის პოლიტიკაზე გადასვლას სხვა ქვეყნებთან დაკავშირებით. მაგრამ სწორედ ამ კონკრეტულ შემთხვევასთან დაკავშირებით, არ ვიცი [ანექსიის მცდელობაზე] რატომ ვსაუბრობთ“, - განაცხადა პაპუაშვილმა.
15 ნოემბერს სოხუმში დემონსტრაციაზე ათასობით ადამიანი შეიკრიბა.
აქციის მონაწილეებმა რკინის ჭიშკარი ავტომობილით გაანგრიეს და დე ფაქტო პარლამენტის ტერიტორიაზე შეიჭრნენ.
მათ წინააღმდეგ სპეციალური საშუალებები გამოიყენეს - გაუშვეს ცრემლსადენი გაზი და ისმოდა სროლის ხმაც.
შალვა პაპუაშვილის განცხადებით, ოკუპირებულ აფხაზეთში მიმდინარე არეულობა „უპირველეს ყოვლისა, არის შედეგი იმისა, რომ არის საოკუპაციო მმართველობა“:
„ნებისმიერ ტერიტორიაზე, რომელშიც არ არის ინსტიტუციები და არის საოკუპაციო მმართველობა, რა თქმა უნდა, სტაბილურობა შეუძლებელია“, - თქვა მან.
პაპუაშვილი პირველია საქართველოს ხელისუფლების მაღალი თანამდებობის პირთა შორის, რომელიც ამ საკითხს ეხმაურება.
„ამიტომაც არის, რომ ვამბობთ ჩვენც, რომ ჩვენს საერთო ინტერესშია, ჩვენი აფხაზი თანამოქალაქეების ინტერესშია, ერთიან საქართველოს ფარგლებში განვითარდეს მთლიანად ჩვენი ქვეყანა, მათ შორის აფხაზეთი და აფხაზეთის მოქალაქეების კეთილდღეობა სწორედ ასე განვითარდება“, - აცხადებს იგი.
„ნებისმიერი ასეთი ნაცრისფერი ზონა რაც იქმნება, იქმნება საოკუპაციო რეჟიმის წყალობით ხოლმე, საქართველოში იქნება ეს თუ სხვაგან, ყოველთვის არის წყარო დესტაბილიზაციის, ვინაიდან ეს არის არაფუნქციონირებადი ინსტიტუციების მქონე ტერიტორია“, - ამბობს შალვა პაპუაშვილი.
პროტესტის შემდეგ, აფხაზეთის დე ფაქტო პრეზიდენტის, ასლან ბჟანიას პრესსამსახურის ინფორმაციით, ადმინისტრაცია ამზადებს დოკუმენტს სადავო კანონპროექტის დე ფაქტო პარლამენტიდან გაწვევის შესახებ.
საუბარია კანონპროექტზე, რომელიც მიზნად ისახავს „რუსეთის ფედერაციის მთავრობასა და აფხაზეთის რესპუბლიკის მთავრობას შორის რუსეთის იურიდიული პირების მიერ აფხაზეთის რესპუბლიკის ტერიტორიაზე საინვესტიციო პროექტების განხორციელების შესახებ ხელშეკრულების“ რატიფიცირებას, - რამაც ხალხის მღელვარება გამოიწვია.
ოპოზიციის მოთხოვნაა, რომ ასლან ბჟანია „უპირობოდ გადადგეს პრეზიდენტის პოსტიდან“.
სადავო ხელშეკრულებით, რუს ინვესტორებს მიენიჭებათ მრავალი სახის პრივილეგია, მათ შორის საგადასახადო პრივილეგიები და შესაძლებლობა, რომ მიწაც ჩაიგდონ ხელში.
