მიტინგი არ იშლება, ბჟანიას გადადგომის მოლოდინში - "მისთვის სოჭიდან ორი ვერტმფრენი ჩაფრინდა"
15 ნოემბერს, დღის მეორე ნახევარში, მომიტინგეები ე.წ. პარლამენტისა და მთავრობის ადმინისტრაციის შენობებში შეიჭრნენ. ტელეგრამარხ RESPUBLICA-ს ინფორმაციით, ასლან ბჟანია შენობიდან იმ დროს გაიყვანეს, როცა მისი პირადი დაცვის უფროსი ხალხთან დასალაპარაკებლად გავიდა. ფიქრობენ, რომ ეს წინასწარ დაგეგმილი სვლა იყო, რათა „პრეზიდენტი“ მიწისქვეშა გასასვლელითა და შემდეგ ავტომანქანით, ტერიტორიიდან უსაფრთხოდ გაეყვანათ.
სოციალურ ქსელებში გავრცელებული ბოლო ცნობებით, ბჟანიამ სადავო კანონის პარლამენტიდან გაწვევის, ხოლო თავად პარლამენტის დაშლის გადაწყვეტილება მიიღო, მოსკოვისა და სტამბოლის წარმომადგენლებთან კონსულტაციების შემდეგ.
მოელიან, რომ ასლან ბჟანია გააკეთებს განცხადებას ან გადადგომის, ან ვადამდელი არჩევნების დანიშვნის შესახებ.
„შემდეგ მან შესაძლოა ვერტმფრენით დატოვოს აფხაზეთი. სოჭიდან მისთვის ორი ვერტმფრენი ჩაფრინდა. ისინი [ბჟანიას] შესაძლო ევაკუაციის საჭიროებას საიდუმლო ადგილას ელოდებიან. ჯერჯერობით გადაწყვეტილებების შემუშავების პროცესი მიმდინარეობს. კრემლი ამ პროცესში არ მონაწილეობს“, - ვკითხულობთ ტელეგრამარხ "НЕЗЫГАРЬ"-ის ცნობაში, რომელიც RESPUBLICA-მ გაავრცელა.
მანამდე, გავრცელდა ინფორმაცია, რომ დე ფაქტო რესპუბლიკის ლიდერები მართავენ შეხვედრას ოპოზიციასთან - თუ ვინ იქნება ე.წ. პრეზიდენტის მოვალეობის შემსრულებელი, ასლან ბჟანიას შესაძლო გადადგომის შემდეგ. ამის შესახებ ოპოზიციონერი პოლიტიკოსი კან კვარჩია აცხადებდა.
15 ნოემბერს, ოკუპირებულ აფხაზეთში, მოვლენები მოულოდნელად სწრაფად განვითარდა, როცა ქუჩაში ათასობით ადამიანი გამოვიდა. დღის მეორე ნახევარში, ისინი ე.წ. პარლამენტისა და მთავრობის ადმინისტრაციის შენობებში შეიჭრნენ. იყო მცირედი დაპირისპირება, მომიტინგეების წინააღმდეგ ცრემლსადენი გაზიც გაუშვეს, მაგრამ შემდეგ - ძალოვნებს მათთვის წინააღმდეგობა აღარ გაუწევიათ.
აქცია ე.წ. პარლამენტის შენობასთან, 15 ნოემბერს, დილიდან იმართებოდა - როცა სოხუმსა და მოსკოვს შორის საინვესტიციო ხელშეკრულების რატიფიცირება იყო დაგეგმილი. საკითხის განხილვა ჩაიშალა. დღის წესრიგში საკითხის შესატანად, ე.წ. დეპუტატების რაოდენობა არასაკმარისი აღმოჩნდა და სესია არ შედგა.
გავრცელებული ცნობებით, სოხუმში მიმდინარე აქციის მონაწილეებმა რკინის ჭიშკარი ავტომობილით გაანგრიეს და ე.წ. პარლამენტის ტერიტორიაზე ამ გზით შეიჭრნენ. რკინის ზღუდე მათ რამდენიმე ადგილას გაარღვიეს. როგორც იუწყებიან, ამჟამად, ჭიშკარი საერთოდ მოხსნილია ე.წ. სამთავრობო შენობების გარშემო.
აქციის მონაწილეები სოხუმისა და მოსკოვის საინვესტიციო ხელშეკრულების საბოლოოდ ჩაგდებას მოითხოვდნენ; ხოლო დღის მეორე ნახევრიდან, მათი მთავარი მოთხოვნა - ე.წ. პრეზიდენტის უპირობო გადადგომა იყო.
რუსეთის მიერ ოკუპირებული აფხაზეთის ე.წ. ხელისუფლება სადავო ხელშეკრულებას ეკონომიკის სტიმულირების საშუალებად წარმოაჩენდა, ხოლო ოპონენტებისთვის ეს დე ფაქტო სახელმწიფოს ინტერესების დათმობის ტოლფასია.
ამ ხელშეკრულებით რუს ინვესტორებს მიენიჭებათ მრავალი სახის პრივილეგია, მათ შორის საგადასახადო პრივილეგიები და შესაძლებლობა, რომ მიწაც ჩაიგდონ ხელში. ოკუპირებულ ტერიტორიაზე შიშობენ, რომ რუსი ინვესტორების პრივილეგიები კონკურენციას მოსპობს და ადგილობრივ ბიზნესს გაანადგურებს.