Ուզու՞մ եք խոսենք շրջաբերականից, ի՞նչ խնդիր կա, կեղծիքը հերքելուց հեշտ բան չկա։ Այս մասին ԱԺ ամբիոնից ելույթի ժամանակ ասաց «Հայաստան» խմբակցության պատգամավոր Քրիստինե Վարդանյանը:
«Ձեր ասածի մեջ ճշմարտություն է երկու բան՝ Դաշնակցությունը ժողով անում է, այո, Դաշնակցությունը շրջաբերականներ իջեցնում է: Ավելին, 004-ը չի մենակ, կա շուրջ 300 շրջաբերական, էլ ո՞նց ասենք, որ դա կեղծիք է: Դաշնակցությունն իր ժողովներում չի քննարկում Հայաստանի և Արցախի ինքնիշխանությունը այլ պետությանը զիջելու, ոչ, Դաշնակցությունը չի կարծում, որ մենք սահմաններ պիտի չունենանք, հերքում եմ, ոչ, Դաշնակցությունը չի կարծում, որ մենք, օրինակ, Թուրքիայի հետ հարաբերությունները պիտի երբեք չկարգավորենք։ Հերքում եմ, էլ ո՞նց հերքեմ։
Եթե այսքանից հետո չեք հասկանում, գործընկերներիս կոչ եմ անում էլ երբեք չանդրադառնալ այս թեմային։ 2019-ին էլ ձեր կրթության նախարարը տարածում էր նեոբոլշևիկյան ամենակեղծ փաստաթղթերից մեկը, իբրև Արամ Մանուկյանը նամակ է գրել թուրքերին, Անդրանիկ Օզանյանն էլ հանձնել է, ձերը այդ մակարդակն է։ Եթե Դաշնակցությունը գործերը թողնի ու ձեր ամեն ասածը հերքի, ու՞ր կհասնենք։ Վահագն Ալեքսանյանին ի՞նչ կա, ջանը սաղ, կարող է այդպիսի բաներ գրել, քանի՞ անգամ պիտի հերքենք»,- ասաց նա:
Վարդանյանն անդրադարձավ նաև իշխանական պատգամավորների՝ «Հոկտեմբերի 27»-ին վերաբերող ելույթներին:
«Պատգամավորը խորհրդավոր հայացքով նայում է մեր կողմը ու ասում՝ եկեք տեսնենք, թե հոկտեմբերի 27-ի շահառուները ովքեր են։ Երկաթբետոնյա տրամաբանությամբ ասում է՝ Նաիրի Հունանյանը նախկին դաշնակցական էր։ Նաիրի Հունանյանի արարքների համար մենք կրում ենք ճիշտ այնքան պատասխանատվություն, ինչքան կրում ենք Հովիկ Աղազարյանի քվեարկությունների համար։
Հանկարծ մյուս անգամ չհամարձակվեք Արցախը հանձնելուն էլ ասեք Դաշնակցությունն է արել, որովհետև Հովիկ Աղազարյանը նախկին դաշնակցական է։ Եկեք պարզենք՝ ովքեր են հոկտեմբերի 27-ի շահառուները: Հոկտեմբերի 27-ին համազգային ողբերգության, պետության գլխատման այդ խառը իրավիճակում, երբ որ այստեղ դեռ պատանդներ կային, մի խումբ մարդիկ այդ ժամանակվա երկրի ղեկավարին ներկայացնում են ցանկ ու ասում են, որ այդ մարդկանց պիտի պաշտոն տաք, թե չէ երկրում խառնաշփոթ կառաջանա։
Ցանկի 5-ից երկուսին պաշտոն եք տվել, մեկն էլ Անդրանիկ Քոչարյանն է՝ դիմացս նստած է։ Հիմա ե՞ս եմ հոկտեմբերի 27-ի շահառուն, թե Անդրանիկ Քոչարյանը։ Ում հոկտեմբերի 27-ը հետաքրքրում է, թող գնան համացանցում նայեն Վազգեն Սարգսյանի եղբոր 2020 թվականին տված հետևյալ վերտառությամբ հարցազրույցը՝ «Այն արտաքին ուժերը, ովքեր կազմակերպեցին հոկտեմբերի 27-ը, կանգնած են այսօրվա իշխանության թիկունքին»։ Բառացիորեն մարդը ասում է հոկտեմբերի 27-ը կազմակերպվել էր նրա համար, ինչը 20 տարի հետո արեցին»,- ասաց Վարդանյանը:
Անդրադառնալով ՀՅԴ-ի՝ պատերազմին մասնակցելու վերաբերյալ իշխանականների հայտարարություններին, Վարդանյանը նշեց.
«Այստեղ հարցականի տակ են դնում Դաշնակցության մասնակցությունը պատերազմին, դուք ուղղակի օգտվում եք մեր ամոթ ունենալու զգացումից, ուրիշ բան չկա։ Ուղղակի օգտվում եք նրանից, որ ամաչում ենք ամեն անգամ գանք, կանգնենք, ասենք, որ շուրջ 500 զոհ ենք տվել։ Ես գիտեմ պատերազմներին Դաշնակցությունը ու՞ր է եղել, բոլոր պատերազմներին գիտեմ, այ ձեր ու՞ր լինելն է հարցական։
Երեկվա Նիկոլ Փաշինյանը երեք թեմայի անդրադարձավ, պարզվեց, որ երեք թիրախ ունեք, կամավորը՝ Սողոմոն Թեհլիրյանը՝ Թուրքիայի ղեկավարներին մահվան դատավճիռ իրականացված կամավորը, Հայաստանի բանակը և Անկախության հռչակագիրը։ Կբացատրեք, ո՞նց են ձեր Էրդողանի ու Ալիևի թիրախները միշտ նույնը։ Ո՞նց է այդպես լինում, որ այս ամբողջ աշխարհում պտտվում եք ու նույն թիրախներին եք միշտ խփում»,- ասաց Քրիստինե Վարդանյանը:
