Mary welaýatyna ýagyn ýagdy we yzýany elektrik tok üpjünçiligi kesildi. Ýollaryň sürçekligi sebäpli kän awtoulag çaknyşygy boldy. Bu barada Azatlygyň Marydaky habarçylary 6-njy noýabrda habar berdiler.
Mary welaýatynda irden ýagan ýagyş zerarly Garagum, Baýramaly, Türkmengala etraplarynda elektrik energiýasy kesildi. Toksyz galan ýaşaýjylar elektrik energiýasy bilen üpjünçilige jogapkär edaralara jaň edip, çäre görmegi soraýarlar.
Azatlyk bilen gürleşen maryly ýaşaýjylar köp adamlar jaňlaryna jogap berilmeýändigini, berlen ýagdaýynda takyk bir zat aýdylmaýandygyny, sandan çykan transformatorlaryň gün uzyn bejerilmeýändigini gürrüň beriler.
"Tok simleriniň üzülip, sypan ýerleri bar agşama çenli bejermekçi bolýarys diýip aýdýarlar" diýip, ýerli ýaşaýjy elektrik üpjünçiligine jogapkär edaranyň işgärine salgylanyp, gürrüň berdi we hiç hili netije bolmandygyny aýtdy.
Habarçylar etraplarda uzakly gün toguň ýokdugyny aýdyp, ýerli ýaşaýjylaryň elektrik togy bilen üpjünçiliginiň tiz wagtda ýola goýulmagynyň ähtimallygy babatynda umytdan düşýändigini we ýerli häkimiýetlerden nägile bolýandygyny belleýärler.
"Ýetmezçilik edýän şaýlaryň ýokdugyny aýdyp, [elektrik edarasy] adamlardan 40 manatdan pul toplaýar we ýetmezçilik edýän şaýlary satyn almakçy bolýar. 'Transformator hatardan çykdy, ätiýaçlyk şaýlary bizde, ýagny döwlet edarasynda ýok, pul goşup, hususy telekeçilerden almaly' diýip aýdýarlar Emma adamlar pul bermekden ýüz öwürýär, biz näme üçin pul tabşyrmaly ýa-da goşmaly biz onsuzam her aý ulanyp harçlan toklarymyza zordan pul töleýäris diýip jogap berýärler" diýip ýerli çeşme aýdýar.
Azatlygyň habarçylary bilen gürleşen ýaşaýjylar ozalky ýyllarda mugt bolan suwuň, gazyň we elektrik energiýasynyň tölegli edilmeginiň bu hyzmatlaryň hiline oňyn täsir etmändigini belleýärler.
"Halkdan pul çöplediler, tölegli etdiler hany ol pullar nirede?" diýip, maryly ýaşaýjylar janygýarlar.
Türkmenistanyň hökümeti ýurt ilaty üçin 25 ýyllap mugt bolan suw, gaz we elektrik energiýasy üçin tölegleri 2017-nji ýylda girizdi. Şonda bäri jemagat hyzmatlary üçin tölegler onlarça esse gymmatlady, emma hili gowulanmady.
Suw, gaz we elektrik energiýasy hem säherlerde, hem-de oba ýerlerinde ýygy-ýygydan kesilýär. Tebigy ýagdaýlar ilatyň uzak wagtlap, toksuz we suwsuz galmagyna goşmaça sebäp bolýar.
Maryda ýagan ýagyşyň netijesinde köşelerde suw üýşdi we köpden bäri bejerilmedik asfalt ýollarda çukurlaryň köpelmegine getirdi.
"Uly çukurlar emele geldi. Bu köçeler sähel ýagyn ýagsa palçyk we sürçek bolýar. Awariýa gaty kän. Nirä seretseň awtoulag çaknyşygy" diýip, maryly çeşmeleriň ýene biri gürrüň berdi.
Tebigy ýagdaýyň netijesinde dörän ýol hadysalarynyň adamlaryň hem howpsuzlygyna wehim salandygy, hem-de durmuş derejesi barha agyrlaşýan ýerli ilata goşmaça maddy kynçylyklary döredendigini belleýärler.
"Ýol hadysasyna uçran adamlar pullary bolman tölemekden ýüz öwürýärler. Tölejek diýýänlerinde hem pul ýok" diýip, maryly çeşme gürrüň berdi.
Türkmenistanyň häkimiýetleri we döwlet media serişdeleri ne tebigy hadysalar we olaryň ilata ýetirýän zyýany, ne-de ýol hadysalary barada habar berýärler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
