6 ნოემბერს სააპელაციო სასამართლომ შეცვალა გორის რაიონული სასამართლოს 4 ნოემბრის გადაწყვეტილება, რომლითაც გორის 32-ე საოლქო საარჩევნო კომისიას 15 უბნის ბიულეტენების გადათვლა დაავალა. ეს დავა სააპელაციო სასამართლომ საარჩევნო ადმინისტრაციის სასარგებლოდ გადაწყვიტა და შესაბამისად ძალა დაუკარგა პირველი ინსტანციის სასამართლოს გადაწყვეტილებას.
გარდა ამისა, სააპელაციო სასამართლომ არ დააკმაყოფილა 26 ოქტომბრის საპარლამენტო არჩევნებზე დამკვირვებელი არასამთავრობო ორგანიზაციის, “სამართლიანი არჩევნების” საჩივრები, რომლებითაც ორგანიზაცია ასაჩივრებდა თბილისის საქალაქო სასამართლოს გადაწყვეტილებას ორი ოლქის - ჩუღურეთისა და კრწანისის - საოლქო საარჩევნო კომისიებთან დაკავშირებით და ითხოვდა ბიულეტენების ხელახლა გადათვლას. სააპელაციო სასამართლომ ძალაში დატოვა პირველი ინსტანციის სასამართლოს გადაწყვეტილება.
26 ოქტომბრის საპარლამენტო არჩევნების წინასწარი ოფიციალური შედეგებით, პირველ ადგილზე ხმების 50%-ზე მეტით მმართველი პარტია „ქართული ოცნებაა“. 5%-იანი ბარიერი გადალახა ოთხმა ოპოზიციურმა პოლიტიკურმა გაერთიანებამ.
„ქართული ოცნება“ - 53,931%;
„კოალიცია ცვლილებისთვის“ - 11,035%;
„ერთიანობა - ნაციონალური მოძრაობა“ - 10,167%;
„ძლიერი საქართველო“ - 8,81%;
„გახარია საქართველოსთვის“ - 7,768%.
ოპოზიციურმა პარტიებმა და საქართველოს პრეზიდენტმა საპარლამენტო არჩევნების შედეგი გაყალბებულად გამოაცხადეს, არ აღიარეს და მოითხოვეს ახალი არჩევნები, რომელიც, მათი განცხადებით, საერთაშორისო საარჩევნო ადმინისტრაციამ უნდა ჩაატაროს.
არჩევნების მეორე დღეს, 27 ოქტომბერს, საერთაშორისო სადამკვირვებლო მისიებმა გამოაქვეყნეს წინასწარი დასკვნები, რომლებშიც მიუთითებდნენ არჩევნების პროცესში ზეწოლის, დაშინებისა და სავარაუდო გაყალბების შემთხვევებზე.
ამ განცხადებებს მალევე მოჰყვა პარტნიორი ქვეყნების, მათ შორის აშშ-ის, განცხადებები საქართველოში ჩატარებული საპარლამენტო არჩევნების დარღვევების გამოძიების აუცილებლობაზე.
მაგალითად, აშშ-ის სახელმწიფო დეპარტამენტის პრესსპიკერმა მეთიუ მილერმა 28 ოქტომბერს გამართულ პრესკონფერენციაზე განაცხადა, რომ აშშ-ს სურს საარჩევნო დარღვევების გამოძიება.
არჩევნების დღეს ჩადენილ სავარაუდო დანაშაულებზე სისხლის სამართლის 47 საქმეზე დაიწყო გამოძიება. მათ შორის, ორი ადამიანი დაკავებულია საარჩევნო დოკუმენტაციის გაყალბების ბრალდებით.
