ოთხშაბათს მოსკოვში რუსეთის უზენაესმა სასამართლომ დონეცკის ყოფილ სეპარატისტთა მეთაურის, იგორ სტრელკოვის (გირკინი) განაჩენის კანონიერება ცნო. ამის შესახებ „ინტერფაქსი“ იუწყება. სტრელკოვს მიმდინარე წლის იანვარში ექსტრემისტული საქმიანობისკენ მოწოდების ბრალდებით მიესაჯა 4 წლით თავისუფლების აღკვეთა საერთო რეჟიმის კოლონიაში სასჯელის მოხდით.
სხდომა დახურულ კარს მიღმა გაიმართა. ამჟამად ფსბ-ს ყოფილი პოლკოვნიკი იგორ სტრელკოვი სასჯელს იხდის კიროვის ოლქის მე-5 კოლონიაში.
სტრელკოვი 2023 წლის ივნისში დააკავეს. გამომძიებლების თქმით, Telegram-ში მისი ორი პოსტი შეიცავდა ექსტრემისტული ქმედებებისკენ მოწოდებებს. მან დანაშაული არ აღიარა.
წინასწარ პატიმრობაში ყოფნისას სტრელკოვმა გამოხატა განზრახვა, მონაწილეობა მიეღო 2024 წლის რუსეთის საპრეზიდენტო არჩევნებში. მან ასევე მოუწოდა თანამებრძოლებს, დაეწყოთ კამპანია მისი კანდიდატურის წარდგენისა და ხელმოწერების შეგროვების მხარდასაჭერად, მაგრამ ეს ვერ მოხერხდა.
ციხეში ყოფნისას სტრელკოვმა არაერთხელ მოითხოვა ფრონტზე გაგზავნა, მაგრამ ვერა და ვერ შეძლო ე.წ. სპეციალური სამხედრო ოპერაციის ზონაში მოხვედრა, მიუხედავად იმისა, რომ რუსეთში პატიმრებს აქტიურად იწვევენ ომში მონაწილეობის მისაღებად. თავად სტრელკოვი და მისი მომხრეები ამას უკავშირებენ ხელისუფლების მხრიდან ფარულ აკრძალვას. „დავუკავშირდი სამხედრო აღრიცხვისა და გაწვევის სამსახურის წარმომადგენლებს, რომლებიც კოლონიაში იყვნენ ჩამოსული, მაგრამ ორჯერ მითხრეს უარი ჩემი განაცხადის მიღებაზეც კი. ერთხელ იმ მიზეზით, რომ „ჩვენ არ გვჭირდება პოლკოვნიკები“, უარის თქმის მიზეზად მუხლიც კი არ დაუსახელებიათ“, - თქვა მან.
რაზმმა, რომელსაც სტრელკოვი მეთაურობდა, 2014 წლის აპრილში აიღო უკრაინის ქალაქი სლავიანსკი, რაც დონბასში შეიარაღებული კონფლიქტის დასაწყისად იქცა. 2014 წლის მაისიდან აგვისტომდე მსახურობდა თვითგამოცხადებული „დონბასის სახალხო რესპუბლიკის“ „თავდაცვის მინისტრად“. რუსეთში დაბრუნების შემდეგ, სტრელკოვმა თანდათან დაკარგა ხელისუფლების კეთილგანწყობა, მას რადიკალურად ომის მომხრე პოზიციები ეკავა და დაიწყო რუსეთის პრეზიდენტ ვლადიმირ პუტინის კრიტიკა. სტრელკოვმა რუსეთის სამხედრო ხელმძღვანელობა და პრეზიდენტი საბრძოლო მოქმედებების არასაკმარის ეფექტიანობაში დაადანაშაულა.
2022 წლის ნოემბერში იგორ სტრელკოვს ჰააგის სასამართლომ დაუსწრებლად მიუსაჯა უვადო პატიმრობა. სასამართლოს თანახმად, ის დაკავშირებულია 2014 წლის ივლისში მალაიზიის ავიაკომპანიის ბოინგის კატასტროფაში, რომელსაც 298 ადამიანი ემსხვერპლა. სტრელკოვი ბრალს არ აღიარებს.
