Նոյեմբերի 3-ին Հայաստանում կայացավ Project Management Awards 2024-ը, որի նպատակն էր ներկայացնել և ըստ արժանվույն գնահատել Հայաստանում իրականացվող լայնամասշտաբ նախագծերը։
Ներկայացված բազմաթիվ նախագծերից հեղինակավոր ժյուրին, որը ներառում էր ոլորտի առաջատար մասնագետների, ընտրեց լավագույն նախագծերը և դրանց հեղինակ պրոֆեսիոնալներին՝
1. Տարվա նախագծի ղեկավար-Դավիթ Ծերունյան, Մանկական Եվրատեսիլ երգի մրցույթ 2022
2. Նորարարության նախագծի ղեկավար-Նարինե Իսկանդարյան, e-Disability հարթակ, Անձի ֆունկցիոնալության գնահատման համակարգ
3. Կայունության նախագծի ղեկավար-Էլեն Մանուկյան, Հայաստանի նորաձևության և տեքստիլ արդյունաբերության համար կայուն էկոհամակարգի ստեղծում
4. Սոցիալական ազդեցության նախագծի ղեկավար-Լիա Հարությունյան, Սոցիալական պաշտպանության կառավարման տեղեկատվական համակարգ (ProMIS)
Ներկայացված նախագծերը խոշոր են և պետական մասշտաբով կարևորություն ունեն, ի ցույց են դնում նախագծերի կառավարման կարևորությունը՝ հատկապես խոշոր ծրագրեր իրականացնելիս։
«Մեր կառույցում ներգրավված տարբեր ոլորտների նախագծեր իրականացնող պրոֆեսիոնալները բազմիցս փաստել են, որպես մասնագիտություն, նախագծերի կառավարման անհրաժեշտությունը՝ հատկապես, երբ անհրաժեշտ է բարձրացնել արդյունավետությունը։ Այս իմաստով՝ ներկայացված նախագծերը դրա ուղիղ ապացույցն են»,- ասաց PMI Հայաստանի նախագահ Աստղիկ Սահակյանը՝ շնորհավորելով մրցանակակիրներին։
Ներկայացված նախագծերը տպավորել էին նաև նախագծերի կառավարման ոլորտի համաշխարհային հեղինակություն, PMI-ի տնօրենների խորհրդի նախագահ ԼուԷնն Պիկարդին։
«Ողջունում եմ այս մրցանակաբաշխությունը։ Հիմնվելով նախագծերի կառավարման բազմամյա փորձիս վրա՝ կարող եմ ասել, որ ոչ միշտ են դրանք իրականացնողները դառնում տեսանելի և օրինակելի մոդել՝ հասարակության և բիզնեսի կառավարման համար։ Իսկապես տպավորիչ նախագծեր էին ներկայացված, ինչը ևս մեկ անգամ փաստում է մեր հայաստանյան մասնաճյուղի կայացած լինելը»,- ասաց ԼուԷնն Պիկարդը։
Մրցանակաբաշխությանը զուգահեռ, պետական կառավարման ոլորտի տարբեր ներկայացուցիչներ հանդես եկան ելույթներով ու զեկույցներով՝ կիսվելով պետական նշանակության նախագծերի կառավարման իրենց փորձառությամբ։
