წყალდიდობის გამო ვალენსიაში დამატებითი ჯარები გაიგზავნა
ბოლო მონაცემებით, 200-ზე მეტი ადამიანი დაიღუპა, უმეტესობა თავად ვალენსიაში და მიმდებარე რაიონებში. ამასთან, მოსალოდნელია წყალდიდობის მსხვერპლთა რიცხვის გაზრდა.
კრიტიკული ვითარება გამოიწვია ამ კვირაში ორშაბათს დაწყებულმა კოკისპირულმა წვიმებმა. წყლის ნაკადებმა დაანგრია ხიდები, რამდენიმე ქალაქის ქუჩები ტალახით დაიტბორა, დასახლებული პუნქტები მიუვალი აღმოჩნდა და დარჩა ელექტროენერგიის, წყლისა და საკვების გარეშე.
ათასობით ადამიანი გაემგზავრა სოფლად, რათა დახმარება გასწიონ ტერიტორიის გაწმენდაში, მაგრამ ხელისუფლებამ პარასკევს განაცხადა, რომ შაბათ-კვირას სატრანსპორტო კავშირები შეიზღუდება, რათა მაშველებს წვდომა გაუადვილდეთ, იტყობინება BBC.
ესპანეთის ჩრდილო-აღმოსავლეთსა და სამხრეთში კვირამდე ძალაში რჩება უამინდობის შესახებ გაფრთხილებები. სავარაუდოდ, შაბათს კიდევ ერთ გაფრთხილებას გამოაცხადებენ ბალეარის კუნძულების მაცხოვრებლებისთვის.
ვალენსიაში 1700-მდე სამხედრო მოსამსახურე უკვე ჩართულია სამძებრო-სამაშველო ოპერაციებში. ძალისხმევის ნაწილი მიმართულია წყლის ამოტუმბვაზე მიწისქვეშა გვირაბებიდან და ავტოსადგომებიდან, სადაც შეიძლება ადამიანები გამომწყვდეულიყვნენ მოვარდნილი წყლის გამო.
ადგილობრივი ჟურნალისტების ცნობით, ახალი ჯარების ჩასვლასთან ერთად მოელიან დამატებით მძიმე ტექნიკას, ბულდოზერებსა და სატვირთო მანქანებს. სასწრაფო დახმარების სამსახურები ასევე იმედოვნებენ, რომ სამხედროები სამუშაოს დაჩქარებას შეუწყობენ ხელს.