3,6 մլն եվրո. ներկայացվել է Ferrari-ի պատմության մեջ ամենահզոր ճանապարհային մոդելը (լուսանկարներ)
Իտալական Ferrari մեքենաշինական ընկերությունը ներկայացրել է F80 կոչվող նոր հիպերքարը, որը դարձել է ապրանքանիշի պատմության մեջ ամենահզոր ճանապարհային Ferrari-ն, հայտնում է autopilot.ru-ն:
Նոր հիբրիդային ուժային համակարգը նախագծված է «Ֆորմուլա 1» մրցարշավի դիմացկունության տեխնոլոգիաների կիրառմամբ: Այն ունի երեք լիտր աշխատանքային ծավալով V6 շարժիչ՝ 900 ձիաուժ հզորությամբ, որն աշխատում է երեք էլեկտրաշարժիչի հետ համատեղ: Ամբողջ համակարգի ընդհանուր հզորությունը 1200 ձիաուժ է։ Այն թույլ է տալիս մինչև 100 կմ/ժ արագություն զարգացնել ընդամենը 2,15 վայրկյանում: Առավելագույն արագությունը 350 կմ/ժ է, իսկ 100 կմ/ժ արագության պայմաններում արգելակելու համար անհրաժեշտ է ընդամենը 28 մետր տարածություն:
F80-ի գինը ռեկորդ է սահմանել ճանապարհային արտադրության Ferrari-ի համար և սկսվում է 3,6 միլիոն եվրոյից: Մոդելը կարտադրվի ընդամենը 799 օրինակով։