კობახიძე გერმანიის ელჩს: დამარცხდება ყველა, ვინც გულშემატკივრობს „კოლექტიურ ნაცმოძრაობას“
კობახიძემ ელჩს მიმართა, რომ 26 ოქტომბრის საპარლამენტო არჩევნებზე დამარცხდება ყველა, ქართველი თუ უცხოელი, ვინც გულშემატკივრობს „კოლექტიურ ნაცმოძრაობას“.
„მინდა მას [ფიშერს] ვუთხრა, რომ 26 ოქტომბერს კახა კალაძე მთელ გუნდთან ერთად კიდევ ერთხელ მოიგებს მორიგ ჩემპიონთა ლიგას და დამარცხდება, რა თქმა უნდა, ყველა ის ადამიანი, რომელიც გულშემატკივრობს კოლექტიურ ნაცმოძრაობას, იქნება ეს ქართველი თუ უცხოელი. ყოვლად მიუღებელია კოლექტიური ნაცმოძრაობის ხელისუფლებაში დაბრუნება და ნებისმიერი გულშემატკივრობა ამ მოვლენის მიმართ“, - თქვა კობახიძემ.
გერმანიის ელჩმა 14 ოქტომბერს სოციალურ ქსელ X-ში „ქართული ოცნების“ გენერალური მდივნის და თბილისის მერის, კახა კალაძის შესახებ შემდეგი სიტყვები დაწერა: „დღეს ვიღაცამ ავტოგოლი გაიტანა".
პეტერ ფიშერი ასე გამოეხმაურა კალაძის იმ განცხადებას, რომელშიც თბილისის მერმა ევროპისა და კლიმატის საკითხებში გერმანიის საგარეო საქმეთა მინისტრის მოადგილეს, ანა ლიურმანს, უწოდა „ჩვეულებრივი კუბილიუსი კაბაში“.
მედიასთან საუბარში ლიურმანმა თქვა, რომ საქართველოს მთავრობა ქვეყანას სირთულეებს უქმნის ევროინტეგრაციის გზაზე.
„ჩვენ ვიმსჯელებთ საქართველოში შექმნილ მდგომარეობაზე. სრულიად ნათელია, ჩვენ მხარს ვუჭერთ საქართველოს გზას ევროკავშირისკენ, თუმცა ეს არ ეხება საქართველოს ამჟამინდელ მთავრობას, რომელიც ევროკავშირისკენ მიმავალ გზას აფერხებს. მნიშვნელოვანია, რომ საქართველოში ხალხს ჰქონდეს უფლება, თავიანთი გზა თავისუფლად განსაზღვრონ და ამიტომაც, საკვანძო მნიშვნელობისაა არჩევნების სანდოობა, რომ ის თავისუფლად და სამართლიანად ჩატარდეს”, - განაცხადა ანა ლიურმანმა.
გასულ კვირაში ევროპარლამენტმა მიიღო მკაცრი რეზოლუცია, რომელშიც საუბარია საქართველოსთან უვიზო რეჟიმის გადახედვასა და "ქართული ოცნების" საპატიო თავმჯდომარის, მილიარდერ ბიძინა ივანიშვილისთვის სანქციების დაწესებაზე.
საქართველოს ხელისუფლების მიმართ ევროპელი პარტნიორების კრიტიკა გამკაცრდა "აგენტების კანონის" მიღებისა და მზარდი ანტიდასავლური რიტორიკის ფონზე. საქართველოს პარტნიორი ქვეყნებისა და ორგანიზაციების შეფასებით, ეს ხელს უშლის ქვეყნის ევროინტეგრაციას, რასაც არ იზიარებს საქართველოს მმართველი პარტია.