Հանձնաժողովում, երբ լսումների հարցը քննարկվում էր, առաջարկեցի, որ այստեղ ներկա լինեն ռազմական ոստիկանության պետը կամ զինդատախազը, ցավոք սրտի, այդ քննարկումից հետո, հերթական զոհն եղավ անհայտ հանգամանքներում:
Այս մասին ԱԺ-ում լսումների ժամանակ հայտարարեց «Հայաստան» խմբակցության պատգամավոր Գեղամ Մանուկյանը:
«Կարծում եմ, որ դեռ հանձնաժողովում զինված ուժերում խաղաղ պայմաններում կամ ոչ խաղաղ պայմաններում անհասկանալի այս զոհերի ավելացման հետ կապված քննարկումներ կունենանք, բայց հուսամ տիկին դատախազն իր զեկույցում կանդրադառնա ԶՈՒ-ում տիրող իրավիճակի հետ կապված քննությանը:
Ռազմական ոստիկանության պետն այստեղ չէ, ինքն ավելի շատ բջջայինով շարքի առաջ զեկույցն ընդունում է, քան մտածում՝ զինված ուժերում տեղի ունեցող զարգացումների մասին»,- ասաց նա:
Լսումները վարող ՔՊ-ական պատգամավոր Անդրանիկ Քոչարյանը նծեց, որ ինքը, որպես ինֆորմացված պաշտպանության հանձնաժողովի ղեկավար, գիտի, որ զինվորական ոստիկանության պետը երեկ գտնվում էր դեպքի վայրում:
«Ընդհանրապես բոլոր նման դեպքերում զինվորական ոստիկանություն առաջինն է հասնում դեպքի վայր: Խնդիրը հասկացա, մենք կկազմակերպենք մեր հանձնաժողովի շրջանակներում աշխատանքային քննարկում նաև այդ հարցերի շրջանակում, որ վերաբերում է զինված ուժերին և այս ցավալի դեպքերին, որոնց լուծումը մինչև հիմա գտնված չէ»,- ասաց Քոչարյանը:
Նշենք, որ այս պահին ԱԺ-ում ընթանում են խորհրդարանական լսումներ է «Հայաստանի Հանրապետությունում 2019-2024 թթ. ընթացքում հանցավորության վիճակի, կառուցվածքի, դինամիկայի, հաշվառման, բացահայտման հետ կապված հարցերն ու հիմնախնդիրները, բարեփոխումների իրական արդյունքներ» թեմայով։
