Արցախն ինձ համար կլինի այնքան ժամանակ, ինչքան ես շնչում եմ: Այս մասին Եռաբլուրում լրագրողների հետ զրուցում ասաց Արցախի հանրապետության ԱԺ նախկին նախագահ Արթուր Թովմասյանը:
«Արցախի թեման տաք պետք է պահել, ես մեր բոլոր պատգամավորներին խորհուրդ եմ տալիս, որ Արցախի Հանրապետության Ազգային ժողովում հիմա չպետք է լինեն խմբակցություններ, բոլորը մի խմբակցություն են՝ Արցախի ժողովրդի խմբակցությունը»,- ասաց նա:
Թովմասյանը նշեց, որ ՀՀ իշխանությունների հետ ոչ մի կապ չկա:
Հիշեցնենք, որ 2020 թվականի սեպտեմբերի 27-ին Ադրբեջանի Հանրապետությունը պատերազմ սանձազերծեց Արցախի Հանրապետության դեմ:
Ադրբեջանական ԶՈւ-ն, Թուրքիայի ակնհայտ աջակցությամբ, ինչպես նաև վարձկանների ներգրավմամբ, այդ օրվանից սկսեց ռմբակոծել Արցախի բնակավայրերը՝ մայրաքաղաք Ստեփանակերտից մինչև այլ քաղաքներ ու գյուղեր։ Հայաստանում ու Արցախում այդ օրերին հայտարարվել էր ռազմական դրություն ու զորահավաք:
Ադրբեջանական ԶՈւ-ն, Արցախի դեմ մղված պատերազմի ողջ ընթացքում կիրառում էր չթույլատրված զինատեսակներ, այդ թվում քաղաքացիական բնակչության նկատմամբ։
Պատերազմից 44 օր հետո, նոյեմբերի 9-ին Հայաստանի, Ադրբեջանի ու Ռուսաստանի միջև կնքվեց եռակողմ հայտարարություն, որով դադարեցվեցին ռազմական գործողությունները: Ադրբեջանի վերահսկողության տակ անցան Արցախի 7 շրջանները, Շուշին ու Հադրութը։
