Ամերիկյան Meta ընկերությունն արգելափակել է RT-ի, «Ռոսիա Սեգոդնյա»-ի և ռուսական պետական այլ ԶԼՄ-ների օգտահաշիվներն իր հարթակներում (Facebook, Instagram, WhatsApp, Threads): Այս մասին գրում է Reuters-ը:
Meta-ն պարզաբանել է, որ այս ԶԼՄ-ները «խաբուսիկ մարտավարություն են օգտագործել համացանցում գաղտնի ազդեցության գործողություններ իրականացնելու համար»:
««Ռոսիա Սեգոդնյա»-ն, RT-ն և դրանց հետ կապված մյուս ԶԼՄ-ներն այժմ արգելված են մեր հավելվածներում ամբողջ աշխարհում՝ օտարերկրյա միջամտության հետ կապված գործունեության համար», - ասվում է հայտարարության մեջ:
Նախորդ տարիներին Meta-ն ավելի սահմանափակ միջոցներ է ձեռնարկել ռուսական պետական ԶԼՄ-ների նկատմամբ, օրինակ՝ գովազդների արգելափակումը և լրատվամիջոցների հրապարակումների հասանելիության նվազեցումը:
ԱՄՆ պետքարտուղար Էնթոնի Բլինկենն ուրբաթ ասել էր, որ աշխարհի երկրները պետք է ռուսական պետական RT հեռուստաընկերության գործունեությանը վերաբերվեն, ինչպես գաղտնի հետախուզական գործողություններին։
RT-ն դատապարտել է ԱՄՆ-ի գործողությունները՝ ասելով, որ Վաշինգտոնը փորձում է խանգարել հեռարձակողի՝ որպես լրագրողական կազմակերպություն գործունեությանը։
