Մենք սկզբունքային դիրքորոշում ունենք միջազգային սահմանների անձեռնմխելիության վերաբերյալ. Իրանի ԱԳ փոխնախարար
Իրանը մեծ ցանկություն ունի ամրապնդելու հարաբերությունները բոլոր հարևանների հետ և սկզբունքային դիրքորոշում՝ միջազգային սահմանների անձեռնմխելիության վերաբերյալ։ Այս մասին X-ի միկրոբլոգում գրել է Իրանի ԱԳ փոխնախարար Մաջիդ Թախտ Ռավանչին:
«Հենց նոր հեռախոսազանգ ստացա ՀՀ ԱԳ փոխնախարար Վահան Կոստանյանից: Ես վերահաստատել եմ մեր մեծ ցանկությունը՝ ամրապնդել հարաբերությունները մեր բոլոր հարևանների հետ։ Ես նաև արտահայտել եմ մեր սկզբունքային դիրքորոշումը միջազգային սահմանների անձեռնմխելիության վերաբերյալ։ Ես սիրով ընդունեցի Երևան այցելելու նրա հրավերը»,- գրել է իրանցի դիվանագետը:
Նշենք, որ նախօրեին Կոստանյանը հեռախոսազրույց է ունեցել Ռավանչիի հետ։ Այս մասին X-ի իր միկրոբլոգում գրել է ՀՀ ԱԳ փոխնախարարը։
«Բարձր ենք գնահատում Իրանի աջակցությունը Հայաստանի տարածքային ամբողջականությանը։ Մտքեր ենք փոխանակել տարածաշրջանային վերջին զարգացումների շուրջ»,- գրել է նա։